Qyzylordada koronavırýs juqtyrǵandardyń deni 20-69 jas aralyǵynda
QYZYLORDA. QazAqparat - Qyzylorda oblysynda 20-69 jas aralyǵyndaǵy azamattar arasynda koronavırýsqa shaldyǵý deńgeıi joǵary ekeni baıqalady, dep habarlaıdy QazAqparat tilshisi.
Qazir óńirde epıdemıologııalyq jaǵdaı kúnnen-kúnge kúrdelenip barady. Táýligine 40-tan astam jaǵdaı tirkeledi. Osylaısha jappaı qaıta juqtyrý qaýpi óte joǵary bolyp tur.
«Ótken aptadan bastap oblys «sary aımaqqa» ótti, ol óz kezeginde bizge qatań sharalar qabyldaýdyń, jyldam áreket etý qajettiliginiń belgisi. Biz kez kelgen jaǵdaıǵa daıyn bolýǵa tıistimiz. Biz qatań saqtyq sharalaryn qoldansaq qana epıdemıologııalyq jaǵdaıdy turaqty ustap qalýǵa múmkindigimiz bar», - dedi oblys ákimi Gúlshara Ábdiqalyqova.
Oblysta vırýs juqtyrǵan azamattardyń úlestik kórsetkishi, karantındik shekteýge sáıkes algorıtım tártibimen bekitilgen jumystar negizinde nazarǵa alynady. Mundaı shoǵyrlandyrýdy boldyrmas úshin qoǵamdyq tamaqtaný, kópshilik baratyn nysandar, áleýmettik qyzmet etetin mekemelerde saqtyq sharalaryn kúsheıtý baǵytynda qaýlyǵa sáıkes jumys atqarylady.
«Oblysta koronavırýs ınfektsııasyn zertteýge arnalǵan 10 zerthana jumys isteıdi. Zerthananyń bir kúndik qýaty 3420 analız alýǵa jetedi. Ótken jyldan qazirge deıin barlyǵy 279 622 analız jasalǵan. Koronavırýs ınfektsııasymen aýrýǵa shaldyqqandardyń jas shamasy ár túrli. Onyń ishinde 20-69 jas aralyǵyndy azamattar arasynda belsendilik baıqalady. Sonymen qatar, balalar arasynda klınıkalyq belgilersiz jaǵdaılar anyqtalýda», - dep málim etti oblystyq sanıtarııalyq-epıdemıologııalyq baqylaý departamentiniń basshysy Dınara Jańabergenova.
Oblysqa kelgen vaktsınalardy saqtaý maqsatynda 18 tońazytqysh jáne 179 termokonteıner jumys isteıdi. Sonymen qatar, vaktsınalaýǵa 14 egý kabıneti jáne 133 meıirbıke jáne 89 dýbler jumys istep jatyr.
«Aldaǵy ýaqytta qosymsha qala aýmaǵynan «Temirjol» emhanasy, «Senim» klınıkasy, «Intertıch», «Qyzylorda oblystyq keńes berý dıagnostıkalyq ortalyǵy» jáne «Araı sıtı» saýda úıinen egý pýnkteri ashylmaq. Búginde aımaqqa jetkizilgen 27 200 vaktsınanyń barlyǵy medıtsınalyq mekemelerge taratyldy. Ekpeniń I komponenti 10 678 adamǵa salynsa, II komponentimen 3371-ne ekpe jasaldy», - dedi oblystyq densaýlyq saqtaý basqarmasynyń basshysy Dınara Jańabergenova.
Oblys ákimi Gúlshara Ábdiqalyqova dári-dármek qoryn jasaqtaý baǵytynda jumysty úılestirip, dári qorynyń jetkiliktigine qaraı dárihanalardaǵy monıtorıng jumysyn jandandyrýdy tapsyrdy. Sondaı-aq, aldaǵy Ramazan aıynda kópshiliktiń basy qosylatyn aýyzashar kezinde saqtyq sharalaryn qatań túrde baqylaýǵa alý qajettigin tapsyrdy.
Aıta keteıik, Qyzylordada qashyqtan oqıtyn oqýshylardyń úlesi artty.
