Qyzylordada koronavırýs juqtyrǵandar sany ósti - turǵyndarǵa úndeý jarııalandy

QYZYLORDA. QazAqparat – Qyzylorda oblysynda sońǵy bes kúnde koronavırýs ınfektsııasyna baılanysty aýrý kórsetkishi edáýir ósti. Osyǵan baılanysty Qyzylorda oblysy sanıtarlyq-epıdemıologııalyq baqylaý departamentiniń basshysy Dınara Jańabergenova jergilikti turǵyndarǵa úndeý jarııalady, dep habarlaıdy QazAqparat tilshisi.

Qyzylorda oblysynda sońǵy 5 kúnde aýrý kórsetkishi edáýir ósti. Kún saıynǵy vırýs juqtyrý qarqyny artyp keledi. Ótken táýliktiń ózinde 27 jaǵdaı tirkelgen. Bul - jyl basynan beri oryn alǵan bir kúndik eń joǵarǵy kórsetkish.

«Búgingi kúni oblys boıynsha koronavırýstyq ınfektsııa juqtyrǵandar sany 4071-ge jetti. Onyń 3% syrttan tasymaldanǵan bolsa, 56% skrınıngtik tekserý nátıjesinde anyqtalǵan, 41% qarym-qatynas arqyly juqtyrǵan jaǵdaılar.

Aýrý kórsetkishteriniń ósýi Naýryz merekesi kúnderinen keıin oryn alýda. Bul kúnderi karantın talaptaryna qaramastan merekelik korporatıvter, jasyryn toı-jıyndar jasap, shekteý sharalaryn buzýdyń saldary dep boljanady. Karantınge alynyp, úı-jaǵdaıynda oqshaýlanǵan adamdar men olarǵa kútim jasaıtyn adamdardyń da saqtyq sharalaryna salǵyrt qaraýy jaǵdaıdy ýshyqtyrýda. Sebebi vırýstyń adamǵa áser etý jyldamdyǵy joǵary. Onyń ústine vırýstyń mýtatsııalanǵan jańa shtamdarynyń belsendiligi álem boıynsha artyp keledi», - dedi departament basshysy.

Onyń aıtýynsha, qazir Qyzylorda oblysy «jasyl» aımaqta tur. Degenmen arqany keńge salyp, beıǵam otyrýǵa bolmaıdy. Kerisinshe saqtyq sharalaryn álsiretpeı, kúsheıtý qajet ekendigin taǵy da eskertkim keledi. Oıyn-saýyq is-sharalaryn, kórmelerdi, forýmdardy, konferentsııalardy, sondaı-aq otbasylyq saltanatty, estelik is-sharalaryn, onyń ishinde úıde jáne adamdar kóp jınalatyn ózge de is-sharalardy ótkizýge tyıym salynǵan.

«Betperde kııýge, jeke gıgıena erejelerin, qoǵamdyq oryndarda araqashyqtyq saqtaýǵa, dene qyzýy kóterilip, jótel jáne tynys alý qıyndaǵan jaǵdaıda medıtsınalyq kómekke júginýge shaqyramyn. Ata-analarǵa kún saıyn balalarǵa saqtyq sharalarynyń mańyzdylyǵyn túsindirip otyrýdy suraımyn.

Tórtinshi toqsannan bastap bilim berý dástúrli formatqa kóshirildi. Mektep oqýshylary arasynda koronavırýs ınfektsııasy taralýynyń aldyn alý maqsatynda shekteý sharalary, onyń ishinde karantın kezinde bilim berý uıymdaryna qoıylatyn sanıtarııalyq-epıdemıologııalyq talaptar belgilendi. Bul talaptar árbir mektepte buljytpaı oryndalýy tıis.

Árbir turǵyn mamandar keńesine qulaq asyp, karantın talaptaryn oryndasa ınfektsııanyń da taralýyntaratpaýǵa múmkindik bolady. Jaýapkershilik pen qaýipsizdik – ortaq», - dedi Dınara Jańabergenova.

Aıta keteıik, Qyzylordada 5 myńnan astam adam koronavırýs ınfektsııasyna qarsy vaktsına qabyldady.