Qyzylordada koronavırýs juqtyrǵan 2 naýqas aýrýhanaǵa jatýdan bas tartqan
QYZYLORDA. QazAqparat - Qyzylorda oblysy Syrdarııa aýdanynda búgin tańerteń anyqtalǵan 3 naýqastyń ekeýi qoıylǵan dıagnozǵa senbeı, aýdandyq juqpaly aýrýlar aýrýhanasynda em alýdan bas tartqan, dep habarlaıdy QazAqparat tilshisi.
Bul jóninde oblystyq densaýlyq saqtaý basqarmasynyń basshysy Jaqsylyq Abdýsametov Óńirlik kommýnıkatsııalar qyzmetinde ótken brıfıngte aıtyp berdi.
«Syrdarııa aýdanyndaǵy 2 naýqas ózderine qoıylǵan dıagnozǵa qarsylyq tanytqan oqıǵa kezdesti. Mundaı jaǵdaı jumysymyzǵa kedergi keltiredi. Biz turǵyndardy túsinistik tanytýǵa shaqyramyz», – dedi basqarma basshysy.
Sondaı-aq, basqarma basshysy Aral aýdanynda tirkelgen 1 naýqas «Astana – Qyzylorda» baǵytyndaǵy poıyzda jolserik bolǵandyǵyn aıtyp ótti. Ol Túrkistan oblysyndaǵy qaýipti indetti juqtyrǵan naýqasty tasymaldaǵan.
Sońǵy derekter boıynsha Qyzylorda oblysynda 69 adam koronavırýs ınfektsııasyn juqtyrǵan.