Qyzylordada koronavırýs jaıynda jalǵan aqparat taratqandar anyqtaldy
Alǵashqy derek Aral aýdanynda tirkelgen. Onda belgisiz áıel WhatsApp jelisindegi «Klastastar» chatyna «Koronavırýs Bekbaýyldan shyqty, Aralǵa alyp kelip jatyr» dep aýdıojazba arqyly jalǵan habar taratqan.
Ekinshi derekte Jańaqorǵanda belgisiz áıel WhatsApp jelisi arqyly «Aǵaıyndar» chatyna syrqattanbaǵan aýdan turǵynynyń naqty aty-jónin aıtyp, onyń koronavırýs juqtyrǵanyn aıtqan. Bul aýdıojazba da polıtsııa nazaryna ilikti.
«Bul derekter dereý tekserildi. Jedel izdestirý nátıjesinde messendjer arqyly jalǵan aqparat taratqan turǵyndar anyqtaldy. Olardyń biri Aral aýdanynyń 33, ekinshisi Jańaqorǵan aýdanynyń 50 jastaǵy turǵyndary ekeni anyqtaldy. Ustalǵan kúdiktiler óz áreketterin tolyq moıyndap, ókinetindigin aıtty. Atalǵan derekter boıynsha QR Qylmystyq kodeksiniń 274-baby 4 bóligimen (tótenshe jaǵdaı kezinde kórineý jalǵan aqparat taratý) sotqa deıingi tergep-tekserý jumystary júrgizilip jatyr», - dep málim etti Qyzylorda oblystyq polıtsııa departamentiniń baspasóz qyzmeti.
Qazirgi tańda Qyzylorda oblysynda koronavırýs juqtyrǵan 25 adam bar.