Qyzylordada koronavırýs vaktsınasyn saldyrǵandar qatarynda aýyl turǵyndary kóp
QYZYLORDA. QazAqparat - Qyzylorda oblysynda qazirge deıin 95 myńnan astam adam koronavırýsqa qarsy vaktsına aldy. Olardyń arasynda aýyl turǵyndarynyń sany kóp, dep habarlaıdy QazAqparat tilshisi.
Óńirde búginde 800 myńnan astam adam turady. Dárigerlerdiń aıtýynsha, olardyń 370 myńnan astamy ekpe qabyldaýy tıis. Búginge deıin oblysta 95 963 vaktsına qabyldap úlgerdi.
Oblysta turǵyndardyń vaktsına qabyldaýyna barlyq múmkindik jasalǵan. Óńirde osy maqsatta 106 egý pýnkti, 39 jyljymaly egý brıgadasy ashylǵan. Dárigerlerden jasaqtalǵan brıgadalar oblys ortalyǵyndaǵy «Qorqyt ata», «Aray City MALL» jáne «Jibek joly» saýda ortalyqtarynda bar.
Beısenbide oblysta 2 myńnan astam adam ekpe saldyrǵan. Buryn olardyń qatarynda memlekettik qyzmetkerler, bıýdjet salasynyń ókilderi basym bolatyn. Qazir jergilikti turǵyndar tarapynan ekpe qabyldaýǵa nıet bildirgen adamdar qatary kóbeıip keledi.
Oblys ortalyǵyndaǵy «Senim» JShS emhanasy 23 myńnan astam adamǵa qyzmet kórsetedi. Olardyń arasynda 15 myńnan astamy eresekter bolsa, qalǵany balalar. Sondaı-aq, dıspanserlik esepte turatyny - 2 851.
Vaktsınatsııa bastalǵaly beri emhana dárigerleri 2 049 adamǵa birinshi komponentti saldy. Al onyń ekinshi bóligin 796 adam saldyryp úlgergen. Munda kelgen adamdy áýeli dáriger qarap, operator onyń derekterin modýldik bazaǵa engizedi. «Buryn vaktsına tańǵy saǵat segizden keshki altyǵa deıin salynatyn, qazir onyń ýaqytyn uzarttyq. Kúni búginge deıin emhanadan qyzmet alatyndardyń basym bóligi ekpe saldyrdy», - dedi «Senim» JShS emhanasy bas dárigeriniń orynbasary Sholpan Arǵynbaeva.
Eske salsaq, buǵan deıin Qyzylordada koronavırýsqa shaldyqqan naýqastardyń 96 paıyzy jazylyp shyqty.
