Qyzylordada koronavırýs ınfektsııasy balalar arasynda órship barady
Qazir oblystyq balalar aýrýhanasynda 46 bala em alýda. Olardyń arasynda bir jasqa tolmaǵan 13 sábı bar. Al 3 jasóspirim jansaqtaý bóliminde jatyr.
«Koronavırýsqa shaldyqqan balalar sany kún sanap kóbeıip keledi. Oblystyq balalar aýrýhanasyna sáýir aıynan bastap 158 bala kelip tústi. Búgingi kúni tolyq jazylyp shyqqan balalar sany - 82. Osy oraıda ata-analarǵa aıtarym, balalaryńyzdy barynsha sanıtarlyq talaptardy saqtaýǵa shaqyryńyzdar. Іndet jas talǵamaıdy. Sondyqtan balalarmen kópshilikke jerge barýdy azaıtyp, ımmýndyq júıeni jaqsartatyn paıdaly taǵamdardy kóp tutynǵan abzal», - dedi kóp beıindi oblystyq balalar aýrýhanasynyń onkogematolog dárigeri Janna Jandarbekova.
Eske salsaq, Qyzylordada karantın talaptaryna baılanysty jańa qaýly bekitildi.