Qyzylordada «Qorqyt jáne uly dala sazy» óner festıvali ótedi
QYZYLORDA. QazAqparat - Qyzylordada úsh jylda bir uıymdastyrylatyn «Qorqyt jáne uly dala sazy» halyqaralyq folklorlyq-mýzykalyq óner festıvali bıyl 27-29 qyrkúıek kúnderi aralyǵynda ótedi, dep habarlady QazAqparat tilshisi.
Elbasy óziniń «Bolashaqqa baǵdar: rýhanı jańǵyrý» atty baǵdarlamalyq maqalasynda «Jańǵyrý ataýly burynǵydaı tarıhı tájirıbe men ulttyq dástúrlerge shekeden qaramaýǵa tıis. Kerisinshe, zamana synynan súrinbeı ótken ozyq dástúrlerdi tabysty jańǵyrtýdyń mańyzdy alǵysharttaryna aınaldyra bilý qajet. Eger jańǵyrý eldiń ulttyq-rýhanı tamyrynan nár ala almasa, ol adasýǵa bastaıdy....Men halqymnyń taǵylymy mol tarıhy men yqylym zamannan arqaýy úzilmegen ulttyq salt-dástúrlerin aldaǵy órkendeýdiń berik dińi ete otyryp, árbir qadamyn nyq basýyn, bolashaqqa senimmen bet alýyn qalaımyn», - dep atap ótken bolatyn.
Erteń Óńirlik kommýnıkatsııalar qyzmetinde túrkitildes ónerpaz qonaqtar men folklortanýshy ǵalymdardyń qatysýymen baspasóz-konferentsııasy ótip, sharanyń shymyldyǵy túriledi.
Festıval Iran Ǵaıyptyń «Qorqyttyń kóri» spektakliniń kórsetiliminen bastalady. Shara aıasynda, «Turan tańbalary» atty Syr eli qolóner sheberleriniń etnoarheologııalyq kórmesi uıymdastyrylyp, folklor-tanýshy ǵalymdardyń, óner zertteýshileri men festıval qonaqtarynyń qatysýymen «Qorqyt ata murasy: epıkalyq mádenıet, halyq ańyz áńgimeleri jáne áýenderi" taqyrybynda halyqaralyq ǵylymı-teorııalyq konferentsııa ótedi.
Budan bólek, Bolat Shamǵalıuly Sarybaevtyń 90 jyldyǵyna arnalǵan «Bolat Sarybaev jáne túrki álemindegi etnoaspaptaný máseleleri» atty ǵylymı-praktıkalyq konferentsııa josparlanǵan.
Festıvalda Qazaqstan, Ázerbaıjan, Ózbekstan, Qyrǵyzstan, Anglııa, Reseı (Tatarstan, Bashqurtstan), Túrkııa, Qytaı elderiniń, sondaı-aq TÚRKSOI men Túrki akademııasynyń ókilderi, kórnekti ǵalymdar men ónertanýshylar bas qosady dep kútilýde.
Sondaı-aq, meımandar rámizder alańy, oblystyq tarıhı-ólketaný mýzeıi jáne qalanyń tarıhı oryndarymen tanysady dep kútilýde. Qorqyt Ata memorıaldy eskertkishine baryp, «Salt-dástúri saqtalǵan Syr eli» atty etnoaýyl kórinisterin tamashalaıdy.
«Qorqyt jáne Uly dala sazy» atty halyqaralyq folklorlyq-mýzykalyq óner festıvaliniń saltanatty ashylýy 28 qyrkúıek kúni saǵat 19.00-de bolady.
Sharanyń gala-kontserti jáne jabylý saltanaty 29 qyrkúıekte saǵat 18.00-de Qorqyt Ata memorıaldy kesheninde ótedi.
Foto BNews.kz
