Qyzylordada kórermen nazaryna «Abaı» spektakli usynyldy

QYZYLORDA. QazAqparat - Qyzylordada N.Bekejanov atyndaǵy oblystyq akademııalyq teatrynda Ersaıyn Tóleýbaıdyń «Abaı» pesasy boıynsha qoıylǵan spektakli kórermen nazaryna usynyldy, dep habarlaıdy QazAqparat tilshisi.

Spektakl belgili rejısser Hýseın Ámir-Temirdiń sahnalaýymen kópshilikke jol tartty. Onda dala kemeńgeriniń alpys jasqa kelgen kezeńindegi ómiri beınelenedi. Halqynyń qamyn oılap, kóńilin aýyr muń basqan Abaı beınesin sýretteýde óner ujymy óreli ister atqarǵany ańǵarylady. Sol bir aýyr jyldarda kemeńger tulǵanyń baýyr eti - balalary birinen keıin biri kóz jumyp, qanshama aýyr qaıǵyny arqalaǵan edi. Syr kórermeni spektaklden Abaı beınesine kóz sala otyryp, danyshpan aqynnyń ómir joldaryna osylaısha úńildi.

Qoıylym barysynda Abaı rólin QR Mádenıet salasynyń úzdigi Baqytbek Temirbekov joǵary deńgeıde somdaı aldy. Al Dildáni Qazaqstannyń eńbek sińirgen qaıratkeri Zaǵıpa Tólepova beınelese, Áıgerimdi QR Mádenıet salasynyń úzdigi Qarlyǵash Aıtjanova somdady.

Ersaıyn Tóleýbaıdyń «Abaı» pesasy boıynsha qoıylǵan spektakl óskeleń urpaqty ultjandylyqqa, otansúıgishtikke, tilimiz ben dinimizdi berik ustaýǵa tárbıeleıdi. Abaı Qunanbaevtyń ómirinen syr shertetin tragedııalyq spektakl kórermenniń zor qoshemetine ıe boldy.

Ersaıyn Tóleýbaıdyń «Abaı» pesasy Qyzylorda teatrynda jeti jylǵa jýyq ýaqyttan beri turaqty qoıylyp keledi. Al Qazaqstan teatrlarynda kemeńger tulǵanyń ómiri beınelengen spektaklder 1940 jyldardan beri kópshilik nazaryna usynylyp júr.