Qyzylordada qorasynda esirtki ósirgen 61 jastaǵy aýyl turǵyny ustaldy
Qazir Qyzylorda oblysynda polıtsııa qyzmetkerleri «Qarasora» arnaıy jedel-profılaktıkalyq is-sharasyn ótkizýde. Atalǵan shara barysynda polıtsııa qyzmetkerleri Tómenaryq aýylyndaǵy turǵynnyń aýlasynan ósip turǵan erekshe ıisi bar jasyl tústi shópti anyqtady. Turǵyn zań tyıym salǵan esirtki zatyna uqsas ósimdikti óz úıiniń aýlasyndaǵy mal qoranyń ishine zańsyz ekken.
«Qazir 61 jastaǵy turǵyny ustaldy. Oqıǵa ornynda jedel-tergeý toby qyzmetkerleri tyıym salynǵan erekshe ıisi bar jasyl tústi shóp anyqtady. Atalǵan zattar zattaı dáleldeme retinde alyndy. Tıisti saraptama taǵaıyndaldy. Bul derek boıynsha QR Qylmystyq kodeksiniń 300-babynyń 2-bóligimen sotqa deıingi tergep-tekserý amaldary jalǵasýda. Onda quramynda esirtki zattar bar, ósirýge tyıym salynǵan ósimdikterdi zańsyz egip-ósirý jaǵdaıy kórsetilgen. Kúdikti tulǵa aýdandyq polıtsııa bóliminiń ýaqytsha ustaý abaqtysyna qamaýǵa alyndy. «Qarasora» arnaıy jedel-profılaktıkalyq is-sharasy barysynda oblystyq polıtsııa departamentiniń Esirtki qylmysyna qarsy is-qımyl basqarmasynyń qyzmetkerleri esirtkige qatysty 24 quqyq buzýshylyqtyń jolyn kesti. Onyń ishinde ósirýge tyıym salynǵan ósimdikterdi zańsyz egip-ósirýdiń 13 deregi bar», - deıdi Polıtsııa departamentiniń bastyǵy polıtsııa polkovnıgi Bektóre Sultan.
Sondaı-aq, Qyzylordada 254 keli balyqty zańsyz aýlaǵan turǵyn ustaldy.