Qyzylordada kópqabatty úılerdiń terezesinen qulap ketkenderdiń deni - balalar
QYZYLORDA. QazAqparat - Sońǵy jyldary Qyzylorda qalasynda eresek azamattar men balalardyń kópqabatty turǵyn úılerdiń terezesinen qulaý oqıǵasy jıi oryn alady. Baldyrǵandarmen bolǵan qaıǵyly jaǵdaılardyń deni - ata-analardyń baqylaýynsyz qalýynda, dep habarlaıdy QazAqparat tilshisi.
Atap aıtqanda, 2017 jyly - 3, 2018 jyldyń bes aıynda 2 bala terezeden qulap ketken. Olar ártúrli jaraqatpen emdeý mekemelerine jatqyzylǵan. Zardap shekkenderdiń negizgi bóligi - 2-7 jas aralyǵyndaǵy balalar. Sondaı-aq, olardyń qatarynda eresekter de kezdesedi.
Bıylǵy sáýir aıynda 7 jasar bala úshinshi qabattan qulap ketse, mamyrda 22 jastaǵy azamat ta osyndaı jaǵdaıǵa ushyraǵan.
«Statıstıkaǵa súıensek, balalarmen qaıǵyly jaǵdaılardyń kóbisi ata-ananyń qaraýynsyz qalýynan nemese olardyń salǵyrttyǵynan oryn alady. Oıyn balasynyń kez kelgen nársege áýestenip, qoldy-aıaqqa turmaı, mazasyz kúıde bolatyny aıtpasa da túsinikti. Sondyqtan sábıdiń ómirine qaýip tónbes úshin, onyń ár qadamyna abaı bolǵan abzal», - deıdi Qyzylorda oblysy tótenshe jaǵdaılar departamenti tótenshe jaǵdaılardyń aldyn alý bóliminiń aǵa ınjeneri Tımýr Erkebaev.
Mamandardyń aıtýynsha, eńbekke jaramdy azamattar arasynda mundaı jaǵdaılarǵa kóbine qurylys mamandary ushyraıdy. Egde jastaǵy azamattar úshin qulaýdyń saldary óte aýyr.
