Qyzylordada kópqabatty úı órtenip, 60 jastaǵy turǵyn ýlanyp qaldy
QYZYLORDA. QazAqparat - Qyzylordada kóp qabatty úıde bolǵan órtten ýlanǵan 60 jastaǵy turǵyn aýrýhanaǵa jetkizildi, dep habarlaıdy QazAqparat tilshisi.
Oqıǵa 28 maýsymda jergilikti ýaqyt 14.44-te Qyzylorda qalasyndaǵy «Astana» shaǵyn aýdanyndaǵy turǵyn úıdiń 5-qabatynda órt shyqqan. Qyzyl jalynnyń 4-5-qabattardaǵy ózge de páterlerge taralý qaýpi týyndady.
«Órt saǵat 15.16-te sóndirildi. Kóppáterli úıden 26 adam qaýipsiz jerge shyǵaryldy. Olardyń ishinde 14 bala. Ýly gazǵa ýlanyp qalǵan 1961 jylǵy turǵyn qalalyq aýrýhanaǵa jatqyzyldy. Órttiń shyǵý sebebi anyqtalýda», - dep málim etti Qyzylorda oblystyq tótenshe jaǵdaılar departamentinen.
Eske salsaq, budan buryn Qyzylordada kanalǵa batyp ketken 13 jastaǵy qyzdyń denesi tabyldy.
