Qyzylordada kópirden sekirip ketken 17 jastaǵy qyz qutqaryldy
QYZYLORDA. QazAqparat - Tótenshe jaǵdaılar komıteti «Ońtústik óńirlik aeroutqyr jedel-qutqarý jasaǵynyń» qutqarýshylary boıjetkenniń óz-ózine qol jumsaýyna jol bermedi, dep habarlaıdy QazAqparat vedomstvonyń baspasóz qyzmetine silteme jasap.
«2019 jyldyń 4 sáýirinde saǵat 11:26-da Qyzylorda oblysy Tótenshe jaǵdaılar departamentiniń kezekshi bólimine belgisiz adam habarlasyp, HQO mańynda bir qyzdyń Syrdarııa ózenine kópirden sekirip ketkeni jóninde habarlaǵan. Qutqarýshylar oqıǵa ornyna úsh mınýtta jetti. Radıatsııalyq jáne hımııalyq-bıologııalyq qorǵaý bóliminiń basshysy Á.Sahıev pen bas qutqarýshy B.Aljanov sýyq sýǵa sekirip, 200 metrge deıin júzip bardy. Olar sol jerde qyzdy taýyp, ony ózenniń sol jaǵalaýyna shyǵardy. Osy ýaqytta qaıyqpen kelgen qutqarýshylar ózenniń oń jaǵalaýyna jetkizip, alǵashqy medıtsınalyq kómek kórsetti, sodan keıin ony jedel járdem qyzmetkerlerine tapsyrdy» delingen habarlamada.
Kýágerlerdiń aıtýynsha, qyz sýǵa ádeıi sekirgen. Qutqarylǵan 2002 jyly týǵan boıjetken - Qyzylorda qalasynyń turǵyny.
Qazirgi ýaqytta oqıǵanyń mán-jaıy anyqtalyp jatyr.
