Qyzylordada kópirden sekirgen er adam qaıtys boldy
Oqıǵa 17 jeltoqsanda saǵat 00:00 shamasynda bolǵan. Sol ýaqytta oblys ortalyǵynda ornalasqan sol jaǵalaýdaǵy kópirden er azamattyń sekirip, óz-ózine qol jumsaýǵa árekettengendigi jóninde habarlama 102 arnasyna túsken.
«Atalǵan habarlama boıynsha jedel-tergeý toby oqıǵa ornyna jetti. Tekserý barysynda azamat qaıtys bolǵandyǵy anyqtaldy.
Atalǵan derek boıynsha QR Qylmystyq kodeksiniń 105-babynyń 3-bóligimen (Ózin-ózi óltirýge deıin jetkizý) sotqa deıingi tergep-tekserý amaldary bastaldy», - dep málim etti Qyzylorda oblystyq polıtsııa departamentinen.
Vedomstvo málimetinshe, tıisti saraptamalar taǵaıyndaldy. Oqıǵanyń mán-jaıy anyqtalýda.
Eske salsaq, bul - bes kúnniń ishinde kezdesip otyrǵan ekinshi jaǵdaı. Budan buryn Qyzylordada áıel kópirden sekirip qaza tapty.
Foto: polisia.kz
