Qyzylordada kópbalaly analarǵa páter kilti tabystaldy

QYZYLORDA. QazAqparat - Qyzylordada oblys ákimi Qýanyshbek Ysqaqov Jańa jyl qarsańynda kópbalaly analar men «Atameken» balalar aýylynyń eki tárbıelenýshisine jańa páter kiltin tabys etti, dep habarlaıdy QazAqparat tilshisi.

Búgin oblys ákimi Qyzylorda qalasyndaǵy birqatar nysandy aralady. Aldymen balalarǵa arnalǵan áleýmettik qyzmetter kórsetý ortalyǵynyń jumysymen tanysyp, búldirshinderge arnalǵan erteńgilikke qatysty. Sondaı-aq, «Atameken» otbasy úlgisindegi balalar aýylynyń tárbıelenýshilerimen kezdesti. Balalar aýylynda «Robot tehnıkasy», «Medıa klýb», «Shaǵyn tigin sheberhanasy», «Balalar jáne qolóner bólmesi» jáne «Art stýdııasy» kabınetteri ashylǵan.

Balalarmen kezdesý barysynda oblys ákimi Qýanyshbek Ysqaqov «Atameken» otbasy úlgisindegi balalar aýyly turǵyndarynyń birqatar jetistikterine toqtalyp, Jańa jyl merekesimen quttyqtady. Júzdesý barysynda «Atameken» balalar aýylynyń eki tárbıelenýshisi Márııam Áýezhanova men Lıýbov Nejelovaǵa jańa páter kiltterin tabys etti.

Odan keıin oblys ákimi Qýanyshbek Ysqaqov «Nurly-Jer» baǵdarlamasy aıasynda Syrdarııa ózeniniń sol jaǵalaýynda boı kótergen arendalyq turǵyn úıdiń páter kiltterin tabystady. Aıta ketý kerek, búgingi jańa páter ıeleriniń basym bóligi kóp balaly analar men áleýmettik osal toptaǵy azamattarǵa berildi.

Qyzylorda qalasynda sońǵy 6 jylda 15 jańa shaǵyn aýdan boı kóterdi. Nátıjesinde 7 myńnan asa qyzylordalyq baspanaly boldy.

«Aımaqta qurylys salasyndaǵy jumystardyń eń aýqymdysy Qyzylorda qalasyndaǵy Syrdarııa ózeniniń sol jaǵalaýyndaǵy bóliginde atqaryldy. Respýblıkalyq, oblystyq bıýdjet esebinen 820 páterlik 16 kópqabatty arendalyq turǵyn úı men 830 páterlik 17 kópqabatty kredıttik turǵyn úıdiń qurylystary júrgizilýde. Qarjylandyrýdyń barlyq kózderi esebinen esepti merzimde jalpy aýdany 381 myń 308 sharshy metr turǵyn úı paıdalanýǵa berildi», - dedi oblys ákimi Q.Ysqaqov.