Qyzylordada kóp márte paıdalanýǵa jaraıtyn betperde tigiledi
Qyzylordada oblys ákiminiń orynbasary Naýryzbaı Baıqadamov koronavırýstan saqtaný sharalaryna oraı jedel otyrys ótkizdi. Mamandardyń aıtýynsha, koronavırýstan qorǵanýdyń bir tásili – únemi betperde taǵyp júrý. Degenmen, dál qazir dárihanada betperde tapshylyǵy baıqalǵan.
Arnaıy otyrysqa qatysqan oblystyq kásipkerlik basqarmasy, oblystyq densaýlyq saqtaý basqarmasy, Taýarlarmen kórsetiletin qyzmetterdiń sapasy men qaýipsizdigin baqylaý departamenti, «Atameken» kásipkerler palatasy, «DalaTex» tigin fabrıkasy ókilderi men jeke dárihana ıeleri bir sheshimge keldi.
Onda qazirgi ýaqytta tigin fabrıkasynda tigilip jatqan segiz qabatty kóp retti paıdalanýǵa jaraıtyn jeke qorǵanysh betperdesin, Qyzylorda qalasy jáne aýdandardaǵy dárihanalarǵa jetkizý qolǵa alynady.
Búginnen bastap barlyq dárihanaǵa 3 myń danasy jetkiziledi. Ári qaraı suranysqa qaraı 5 myń danaǵa jetkizý jospary bar. «DalaTex» tigin fabrıkasy ókiliniń málimdeýi boıynsha, kelesi aptadan bastap arnaıy qondyrǵynyń kómegimen bir rettik jeke qorǵanysh betperdesi shyǵaryla bastaıdy.