Qyzylordada kóp qabatty úıdegi órtti tártip saqshylary sóndirdi
QYZYLORDA. QazAqparat - Qyzylorda qalasynda polıtsııa qyzmetkerleri kóp qabatty turǵyn úıden shyqqan órtti sóndirip, adamdar ómirin aman saqtap qaldy, dep habarlaıdy QazAqparat tilshisi.
Bul oqıǵa 30 maýsym kúni oryn alǵan. Qyzylorda qalalyq polıtsııa basqarmasynyń qyzmetkerleri - kishi serjant Álıhan Turǵanov pen aǵa polıtsııa leıtenanty Jasulan Mámbetjanov sol kúni keshkilik ózderine bekitilgen aýmaqty aralap júrgen. Qyzmetin atqarý barysynda olar «Syrdarııa» shaǵynaýdanyndaǵy kóp qabatty úıdiń ekinshi qabatynda balkonnyń janyp jatqanyn ańǵarady. Álıhan Turǵanov dereý ekinshi qabatqa órmelep shyǵyp, ondaǵy janyp jatqan dúnıelerdi dereý jerge qaraı laqtyrdy. Bul sátte Jasulan Mámbetjanov turǵyndar men balalardy qaýipsiz jerge shyǵaryp úlgergen edi.
«Polıtsııa qyzmetinde júrgen mamandar mundaı tosyn jaǵdaımen jıi ushyrasady. Ózderiniń ómirine tóngen qaýipke qaramastan batyldyq tanytyp jatady. Álıhan men Jasulannyń bul ıgi isi baǵalaýǵa turarlyq», - dep málim etti Qyzylorda oblystyq polıtsııa departamentiniń baspasóz qyzmeti.
Oqıǵa ornyna kelgen órt sóndirýshiler tártip saqshylarynyń áreketin oń baǵalady. Órt sóndirý isin talapqa saı atqarǵanyn atap ótti.
