Qyzylordada kóp qabatty úıde bolǵan órtten 12 adam qutqaryldy

QYZYLORDA. QazAqparat - Qyzylordada kóp qabatty úıde bolǵan órtten 12 adam qutqaryldy, dep habarlaıdy QazAqparat tilshisi.

Oqıǵa 3 qyrkúıekte saǵat 13:08 shamasynda Qyzylorda qalasyna qarasty Qyzyljarma aýylynda boldy. Kóp qabatty úıdiń besinshi qabatyndaǵy páterde turmystyq zattardyń janýynan órt shyqqan.

«Oqıǵa ornyna oblystyq tótenshe jaǵdaılar departamenti mamandary bardy. Olardyń kúshimen 12 adam (onyń ishinde 3 bala) qaýipsiz jerge shyǵaryldy. Órt tolyq sóndirildi. Qaza bolǵandar men zardap shekkender joq. Órttiń shyǵý sebebi anyqtalýda», - dep málim etti oblystyq tótenshe jaǵdaılar departamentinen.

Eske salsaq, budan buryn Qyzylordada kúdik týdyrǵan qara sómkeden qaýipti zat anyqtalǵan joq.