Qyzylordada qońyr kúzde jaıqalyp gúl ósip tur
QYZYLORDA. QazAqparat - Qyzylordada 20 myń sharshy metr jerge petýnııa, kohııa, portýlak, pelargonııa, tagetes syndy gúlder egip, jaz boıy aınalany saıaly mekenge aınaldyrǵan «Jasulan-Flora» mekemesi endi kúzdik ósimdikter otyrǵyzdy. Bul týraly qalalyq ákimdiktiń baspasóz qyzmeti habarlady.
Sońǵy 2-3 jylda Syr boıynyń bas shahary erekshe gúlge kómkerildi. Klımaty qurǵaq Qyzylorda topyraǵyna ásem de názik ósimdikti ósirý ońaı sharýa emes. Degenmen, kórkeıtý-kógaldandyrý jumysymen ǵylymı túrde aınalysqan «Jasulan-Flora» seriktestiginiń mamandary sortań jerdi gúldendire bildi. Aptap ystyqqa shydas bergen óskinder kúzdiń qońyr salqynynda da jaıqalyp tur.
