Qyzylordada «Kómek eriktileri» klýby quryldy

QYZYLORDA. QazAqparat - Eriktiler jyly aıasynda Qyzylorda qalasyndaǵy Nazarbaev Zııatkerlik mektebinde oqýshylar arasynda «Kómek eriktileri» klýby quryldy, dep habarlaıdy QazAqparat tilshisi.

Eriktiler qozǵalysy 7-12-synyp bilim alýshylarynan quralǵan. Olar negizgi bes baǵyt boıynsha jumys atqarmaq. Máselen, «pedagogtar» pán muǵalimderimen birlesip, úlgirimi tómen oqýshylarǵa kómek kórsetse, «medıtsına qyzmetkerleri» oqýshylar arasynda túrli profılaktıkalyq sharalardy júrgizýge járdemdesedi. Ekolog-volonterlar toby mekteptiń «Qysqy baǵynda» bólme gúlderdi otyrǵyzý jumystaryn júrgizse, «kitaphanashylar uıymy» mekteptiń kitaptar qoryn retteý, sanyn ulǵaıtý jáne kitaphana paıdalaný erejeleri týraly aqparattandyrý sharalaryn uıymdastyrmaq. Sonymen qatar, «ashanashylar» toby oqýshylardyń tamaqtaný rejımin durys oryndalýyn qamtamasyz etýde qajetti kómek kórsetedi.

Qazirgi ýaqytta eriktiler klýbyna 100-ge jýyq oqýshy múshe bolýǵa usynys bildirdi. Aldaǵy ýaqytta josparlanǵan sharalardy júzege asyrý arqyly ózge oqýshylardy volonterlyqqa tartýǵa jáne azamattyq qoǵamnyń belsendiligin arttyrýǵa yqpal etý kózdelýde. «Kómek eriktileri» klýbynyń maqsaty - oqýshylardy áleýmettik jaýapkershilik turǵysynan tárbıeleýge, otansúıgishtikke baýlý, mamandyq tandaýdaǵy kásibı baǵyt baǵdar berýge baǵyttalǵan.

Aıta ketý kerek, búginde elimizde 200-den astam eriktiler uıymy belsendi jumys jasaıdy, olardyń 50 myńnan asa belsendi eriktileri bar.