Qyzylordada kólik urlaǵan 27 jastaǵy turǵyn qolǵa tústi
Qyzylorda qalalyq polıtsııa basqarmasynyń 102 arnasyna 71 jastaǵy qala turǵyny qońyraý shaldy.
Onda kópqabatty úıdiń aýlasynda turǵan «Shevrolet Nexia» kóliginiń urlanǵany aıtylǵan.
Kelgen materıaldyq shyǵyn - 3,8 mıllıon teńge.
«Bul boıynsha barlyq krımınaldy polıtsııa bóliminiń qyzmetkerlerine urlanǵan avtokólik boıynsha baǵyt-baǵdar berildi. Qyzylorda qalalyq polıtsııa basqarmasy qyzmetkerleri qala aýmaǵynda ornalasqan mekteptiń janynan memlekettik belgisi joq kúdikti kólikti toqtatqan edi. Tekserý barysynda bul álgi urlanǵan «Shevrolet Nexia» kóligi ekeni anyqtaldy. Kúdikti retinde oblystyń 27 jastaǵy turǵyny ustaldy», - dep málim etti Qyzylorda qalalyq polıtsııa basqarmasynan.
Vedomstvo málimetinshe, buǵan qatysty QR Qylmystyq kodeksiniń 200-babynyń 1-bóligi boıynsha sotqa deıingi tergeý bastaldy.
Onda avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý jaǵdaıy kórsetilgen.
Eske salsaq, budan buryn Qyzylordada zeınetkerge qaraqshylyq shabýyl jasaǵan eki adam ustaldy.
