Qyzylordada kólik polıtseıi bir otbasyn órtten aman alyp qaldy
«Kúndizgi saǵat 13:30 shamasynda kórshi úıden kómek suraǵan áıeldiń janushyra aıqaılaǵan daýsy estildi. Úıden shyǵa bere kórshi úıdiń órtenip jatqanyn kórdim. Іle-shala jalyn lapyldap jatqan úıge qaraı júgirdim. Órtke oranǵan úıdiń ishinde 1 jasar balanyń qalyp qoıǵanyn estip, ústime sýyq sý quıdym da, birden úıdiń ishine kirip kettim. Tórgi bólmeden Aılın esimdi kishkentaı bir jasar qyzdy taýyp alyp, qaýipsiz jerge shyǵaryp úlgerdim»,- dep eske alady Qyzylorda stantsııasynyń kólik polıtseıi Darhan Ábdikárimov.
Onyń aıtýynsha, bárinen mańyzdycy - adam ómiri. «Sol kezde úı ıeleriniń órtten aman-saý qalǵanyna qatty qýandym», - deıdi Darhan aq júregine aqtaryla.
Órt osy jyldyń 16 qazanynda Qyzylorda qalasy Nur-Orda shaǵyn aýdanynda ornalasqan kópqabatty úılerdiń birindegi páterde oryn alǵan. Kómek suraǵan osy úıdiń Jaına esimdi turǵyny.
«Tilsiz jaý jýynatyn bólmeden shyqty. Anam ekeýmiz órtti ózimiz sóndirýge tyrystyq. Alaıda, órt bizge baǵynbaı úıdiń basqa bólmelerine qaraı órshidi. Dál sol kezde boıymdy qohqynysh bıledi. Meniń aıqaılap kómek suraǵan daýsymdy Darhan esimdi kisi birinshi estip, birden kómekke keldi», - deıdi Jaına. Onyń aıtýynsha, úı ıelerin qaýipsiz jerge shyǵarǵan
Darhan, tútin basqan úıdegi elektr jelilerin ajyratyp, qaýiptiligi bar, tez janyp, jarylyp ketetin zattardy podezge shyǵarǵan. Kórshilerden sý tasyp berýin surap, órtti sóndirýge áreket jasaǵan.
«Darhannyń polıtseı ekenin biletinbiz. Osy áreketinen-aq qyzmetine degen adaldyǵyn kórdik. Osyndaı batyldyqqa baratyn polıtseılerimiz kóp bolsa eken», - dep alǵysyn bildirdi Jaına Ábdiqalyqova.
Darhan Esengeldiuly Qyzylorda stantsııasynyń Jelilik polıtsııa bólinisindegi shtab bólimshesiniń aǵa ınspektory, polıtsııa aǵa leıtenanty.
