Qyzylordada kólik qaqqan áıel nárestesimen birge kóz jumdy
Qyzylorda oblystyq polıtsııa departamentiniń málimeti boıynsha, oqıǵa Tasbóget kentinde 23 shildede jergilikti ýaqytpen 22.50-de bolǵan. «VAZ-2114» kóliginiń ıesi joǵary jyldamdyqpen kele jatqan. Ol «Mercedes-Benz» markaly avtokólikke janaı soǵyp, sodan keıin jol jıeginde kele jatqan tórt adamdy qaǵyp ketken.
«Oqıǵadan jol jıeginde kele jatqan 28 jastaǵy azamatsha men onyń nárestesi sol jerde kóz jumdy. Eki adam túrli deńgeıdegi dene jaraqatymen medıtsınalyq mekemege jetkizildi. Atalǵan derek boıynsha QR Qylmystyq kodeksiniń 345-babynyń 4-bóligimen sotqa deıingi tergeý amaldary júrgizilip jatyr. Onda abaısyzda eki adamnyń nemese odan da kóp adamnyń ólimine ákep soqqan jol júrisi qaǵıdalaryn buzý jaǵdaıy kórsetilgen. Tıisti saraptamalar taǵaıyndaldy. Oqıǵanyń mán-jaılary anyqtalýda», - dep málim etti Qyzylorda oblystyq polıtsııa departamentinen.
Oqıǵa barysynda jaraqat alǵan kináli júrgizýshiniń jansaqtaý bólimine jetkizilgen. Osyǵan baılanysty oǵan qatysty qamaqqa alý túrindegi bultartpaý sharasyn qoldaný máselesi sheshilýde.
Budan buryn Qyzylordada 9 jasar qyzǵa azǵyndyq áreket jasaǵan kúdikti ustaldy.