Qyzylordada kólik apatynan sal bolyp qalǵan jigit án keshin ótkizdi
QYZYLORDA. QazAqparat - Qyzylordada kólik apatynan soń sal aýrýyna ushyraǵan jas jigit Baqdáýlet Ábdildauly án keshin ótkizdi, dep habarlaıdy QazAqparat tilshisi.
Baqdáýlet 1999 jyly Syrdarııa aýdanynyń ortalyǵy - Tereńózek eldimekeninde dúnıege kelgen. 2015 jyly jazataıym kólik apatyna ushyraǵan ol tórt jylǵa jaqyn ýaqyttan beri qanshama otany bastan ótkizdi. Onyń burynnan án aıtýǵa áýestigi bar edi. Taǵdyrdyń jazýyna qasqaıyp qarsy tura bilgen jas jigit óner ólkesinde óz órnegin aıshyqtaýǵa barynsha talpynys jasap keledi. Sanalýan ánderdi naqyshyna keltire shyrqaıtyn ol óz oryndaýyndaǵy áýenderdi áleýmettik jelige júkteıtin boldy. Sonyń arqasynda qazir Baqdáýlettiń ónerinen jergilikti jurtshylyq jaqsy habardar bolyp úlgerdi. Osylaısha tyńdarmandarynyń biri jas ónerpazben baılanys ornatyp, án keshin ótkizýge usynys jasady.
Qyzylorda qalasyna qarasty Tasbóget kentindegi №11 mektep-lıtseı ujymy osyndaı ıgilikti istiń uıytqysy boldy. Olardyń uıymdastyrýymen S.Maıqanova atyndaǵy mádenıet úıinde «Júrekten júrekke» atty qaıyrymdylyq keshi boldy. Sondaı-aq, bul izgi iske jergilikti «Jas Otan» jastar qanaty qoldaý bildirdi.
«Bizdiń mektep oqýshylary Baqdáýletpen baılanys ornatqan eken. Jas ánshi kópshilik arasynda tanymal. Osylaısha Baqdáýlettiń án keshin ótkizý jóninde sheshim qabyldandy», - deıdi №11 mektep muǵalimi Maqpal Náripbaeva.
Óner sharasynda Baqdáýlet óz oryndaýyndaǵy ándermen kópshilik rızashylyǵyna bólendi. Kontsertte «Ólsheýli ómir», «Áke-ana», «Ot jigit», «Shúkir et» ánderi shyrqaldy. Jas jigittiń óner keshinde jergilikti ánshiler Úmit Medeýova, Baıan Bekturǵanova jyly lebizderin bildirdi.
«Elimizde árbir azamatqa laıyqty qoldaý jasalyp keledi. Sol arqyly árbir adam óz ómirin jaqsarta alady. Olardyń qatarynda múmkindigi shekteýli azamattar da bar. Ár adamnyń ózi isin ashýǵa múmkindigi bar. Shyǵarmashylyqpen aınalysýyna da jol ashyq», - deıdi Baqdáýlet.
Baqdáýlet qaıyrymy mol adamdardyń qoldaýyn aıqyn sezinip júr. Osyndaı qoldaý Baqdáýlettiń ómirge degen qushtarlyǵyn kúsheıte túsken. Ol elimizdiń erteńi búginnen de jarqyn bolatynyna zor úmitpen qaraıdy.
«Balam kishkene kezinen án aıtatyn edi. Biz buǵan deıin de Tereńózek kentinde án keshin ótkizip úlgerdik. Búgingi qaıyrymdylyq sharasynyń joǵary deńgeıde ótkeni úshin alǵysymdy bildiremin», - deıdi Baqdáýlettiń anasy Ulǵanym Súgirbaeva.
Atalǵan kontsertke «Jyly júrek jastar» eriktiler tobynyń jetekshisi, múmkindigi shekteýli jandar arasyndaǵy bı baıqaýlarynyń jeńimpazy Saǵatbek Sııýov qatysyp, mektep ujymy men oqýshylaryna jyly lebizin bildirdi. Qaıyrymdylyq kontsertine kirý tegin boldy. Degenmen mádenıet úıinde arnaıy qaıyrymdylyq jáshigi ornatylǵan. Oǵan janashyr jandar aqsha salyp, jınalǵan qarjyny Baqdáýlettiń ózine tabys etti.
Aıta keterligi, Baqdáýlet aldaǵy naýryz aıynda belgili ánshi Ernar Aıdardyń «Tamasha» atty merekelik kontsertine qatysyp, án keshiniń ıesimen birge dýet aıtady dep josparlanyp otyr. Ekeýi «Tym bolmasa» ánin qosyla shyrqaıdy.
