Qyzylordada kólderge 15 mıllıondaı shabaq jiberildi
QYZYLORDA. QazAqparat - Qyzylorda oblysyndaǵy «Qamystybas» balyq tuqymbaǵy 14 mln 800 myń shabaqty óńirdiń sý aıdyndaryna jiberdi, dep habarlady QazAqparat tilshisi oblystyq orman sharýashylyǵy jáne janýarlar dúnıesi ınspektsııasyna silteme jasap.
Jaz boıy kútimmen ósirilgen balyqtar Aral teńizi men kólder júıesiniń ekoqoryn molaıtyp keledi. Sońǵy jyldary «Qamystybas» balyq tuqymbaǵynyń qýattylyǵy 5 ese artyp, jylyna daıyndalatyn shabaq sany 15 mln-ǵa jetken. Bul tek aımaq boıynsha ǵana emes, ózge óńirlerdiń de sý aıdyndaryn balyqtandyrýǵa jetkilikti. Aral aýdanyndaǵy Qosjar men Tastaq aýyldaryndaǵy ıirimdi arnalar balyq qoryn kóbeıtýge qolaıly oryn. Sondyqtan osy jerdegi 224 gektarlyq aýmaqqa teńizdegi tirshiliktiń túleýine tirek bolǵan 34 sý toǵany shoǵyrlanǵan. Sol toǵandardan súzilgen balyqtar sany men salmaǵyna deıin ólsheýden ótkiziledi.
Búginde júz shaqty tútin qonystanǵan Qosjar eldi mekeniniń 150-ge jýyq turǵyny qysy-jazy osy tuqymbaqta ter tógedi. Shúpirlegen maıda shabaqty erekshe mápeleıtin mamandar jyl boıǵy jumysynyń nátıjesin qorytyndylaıtyn sát týdy. 2010 jyldan beri qaraı 105 mln-daı bir jazdyq shabaq, 5 mln-ǵa jýyq 2 jazdyq shabaq sý aıdyndaryna jiberiledi. Aral teńiziniń tuz tatyǵan sýyna kambala balyǵy shydas beretin. Al qazir ashyq aıdynnan sý marjanynyń jıyrma shaqty túri aýlanady. Teńizdiń ıhtıofaýnasy jaqsarýyna oraı «Qamystybas» tuqymbaǵy endi bekiretuqymdas qaıaz jáne pilmaı balyqtaryn ósirýdi qolǵa almaq.
