Qyzylordada kól betine qalqyp shyqqan er adamnyń máıiti tabyldy
QYZYLORDA. QazAqparat - Qyzylorda qalasynyń Qalǵandarııa kóline 61 jastaǵy azamat batyp ketti, dep habarlaıdy QazAqparat tilshisi.
Qyzylorda qalalyq Tótenshe jaǵdaılar departamentiniń kezekshisine polıtsııa qyzmetkerlerinen habar túsken. Onda Qyzylorda qalasynyń «Aeroflot» saıajaıyndaǵy Qalǵandarııa kólinde belgisiz er adamnyń denesi sýdyń betine shyǵyp turǵany aıtylǵan.
«Habarlama boıynsha Ońtústik óńirlik aeroutqyr jedel qutqarý jasaǵynyń 6 qutqarýshysy 2 birlik tehnıkamen oqıǵa ornyna bardy. Er adamnyń denesin sýdan shyǵardy. Odan keıin marqumnyń denesi polıtsııa qyzmetkerlerine tabystaldy», - dep málim etti Qyzylorda oblystyq Tótenshe jaǵdaılar departamenti.
Anyqtaý barysynda bul azamattyń 1958 jyly dúnıege kelgen Qyzylorda qalasynyń turǵyny ekeni belgili boldy.
Búgingi kúnge deıin Qyzylorda oblysynda 10-ǵa jýyq adam sýǵa ketti. Onyń jartysyna jýyǵy balalar bolyp tabylady. Byltyr dál osyndaı jaǵdaıdan 22 adam kóz jumǵan.
Budan buryn Qyzylordada eki kúnde úsh adamnyń sýǵa ketkenin habarlaǵan edik.
