Qyzylordada kóktaıǵaqta 15 jolaýshysy bar avtobýs aýdarylyp qaldy
QYZYLORDA. QazAqparat - Qyzylordada kóktaıǵaq saldarynan 15 jolaýshysy bar baǵdarlyq avtobýs aýdarylyp qaldy, dep habarlaıdy QazAqparat tilshisi.
Atalmysh oqys jaǵdaı oblys ortalyǵynan qalaǵa qarasty Talsýat eldi mekenine barar jolda oryn aldy.
«Avtobýsta bolǵan 15 jolaýshyǵa medıtsınalyq mekemede alǵashqy dárigerlik kómek kórsetildi. Olardyń bireýi aýrýhanaǵa jatqyzyldy», - dep habarlaıdy Qyzylorda oblystyq polıtsııa departamentiniń baspasóz qyzmeti.
Sondaı-aq, búgin kóktaıǵaq saldarynan qala irgesindegi Belkólden Qyzylordaǵa bet alyp kele jatqan KaMAZ kóligi Jappasbaı batyr men Sultan Beıbarys kósheleri qıylysyndaǵy kópir astyndaǵy temir qorshaýǵa soǵyldy. Kólik júrgizýshisi qalalyq aýrýhanaǵa jetkizildi.
Esterińizge sala ketelik, búgin kóktaıǵaq saldarynan zardap shekken 70 adam aýrýhana qyzmetine júgingenin habarlaǵan edik.
Foto: www.instagram.com/zellokyzylorda
