Qyzylordada kógershin ósiretin azamattar sany kóp

Qarmaqshy aýdanynyń turǵyny Gájdenbek Álekeev jarty ǵasyrdan astam ýaqyttan beri kógershin baptaýmen aınalysady. Alǵashqyda kórshi úıden jalǵyz qusty asyraýǵa alady. Sodan bastap ony kútip-baptaýǵa qyzyǵýshylyǵy oıanady. Onyń aıtýynsha, atalǵan qustarǵa qarap kóptegen izgi qasıetterdi baıqaýǵa bolady. Adaldyq pen tynyshtyq, sabyrlylyq pen tózimdilik - kógershinge tán qubylys. Qustardyń ushqanyna qarap mıyń sergip qalady. Ol adamnyń kórý qabiletin arttyra túsedi. Moıynǵa jınalǵan tuzdy ketirýge de olardyń oń áseri bar.

Atalǵan aýdanda turatyn Sarman Qaıyrbaev ta bala jasynan kógershin ósirýmen áýestengen. Sodan beri baıqaǵany bul qus jubymen ushýǵa áýes. Analyǵy joq bolsa atalyǵynyń da jaǵdaıy bolmaıdy, barǵan ortasyna sińise almaıdy, ıaǵnı bir-birinsiz ómir súrýi qıyn. Olardyń keıbiri toqtamastan 2-3 saǵatqa deıin ushady. Tipti, kókte 8 saǵatqa deıin qalyqtaıtyny kezdesedi.

Álemde Germanııada kógershin ósirýdi kádimgi úlken kásip túri etip bekitip, turaqty aınalysady. Olar arnaıy úı salyp, sonda ustaıdy. Erekshe baǵalaıdy.

Qazaly aýdanynyń ortalyǵy - Áıteke bı kentinde turatyn Baqytbek Saıbolsynov kógershin ósirýge bala kezden jaqyn bolǵan. Búginde 37 jasqa kelip qalǵan ol olardyń sanyn 100-den asyrǵan sáti bolǵan eken. Keıinnen tanystaryna kóbisin syıǵa tartyp jibergen. Onyń aıtýynsha, atalǵan qustyń kútimi jaqsy bolsa, eki aptada bes márte eki-eki jumyrtqadan týady. Kógershinder mezgil tańdamastan usha beretin kórinedi. Dese de mekeninen alysqa ushyp ketpeıdi. Qys aılarynda qulashyn keńge jazyp, erekshe yqylaspen samǵaıtyn kórinedi. Menshikti mekenin tańdap alǵannan keıin oǵan ózge qustardy jolata bermeıdi. Bir qyzyǵy, odan urlap ketken keıbir kógershinder óziniń baıyrǵy mekenine qaıtyp kelgen eken.

Budan buryn Qyzylordada tanymal tulǵalarmen esimi de, tegi de uqsas azamattar bir aýylda turatynyn habarlaǵan edik.