Qyzylordada qoǵamdyq kelisimdi saqtaýǵa úles qosqan birqatar azamat marapattaldy

QYZYLORDA. QazAqparat - Qyzylordada oblystyq Qazaqstan halqy assambleıasynyń qorytyndy saltanatty sharasy ótti. Saltanatty shara barysynda óńirde birlik pen qoǵamdyq kelisimdi saqtaýǵa qosqan úlesi úshin birqatar azamat marapattaldy, dep habarlaıdy QazAqparat tilshisi.

Atalǵan shara el Táýelsizdiginiń 30 jyldyǵy aıasynda uıymdastyryldy. Oǵan oblys ákiminiń orynbasary Serik Ahmet, oblystyq ishki saıasat basqarmasynyń basshysy Mıra Qazbekova, oblystyq ishki saıasat basqarmasyna qarasty mekemeler qyzmetkerleri, etnomádenı birlestikter men oblystyq assambleıa qurylymdarynyń basshylary jáne ózge de azamattar qatysty.

Іs-shara barysynda oblys ákiminiń orynbasary, oblystyq QHA tóraǵasynyń orynbasary S. Ahmet eldegi halyq birligin, etnosaralyq dostyq pen qoǵamdyq kelisimdi saqtaý men nyǵaıtýda erekshe ról atqarǵan Qazaqstan halqy Assambleıasynyń mańyzdylyǵyn atap ótti.

Odan ári atalǵan shara marapattaý rásimine jalǵasty. Oblys ákiminiń orynbasary óńirdiń rýhanı-mádenı damýyna, etnosaralyq birlik pen qoǵamdyq kelisimdi saqtaýǵa qosqan úlesi úshin birqatar azamattarǵa «Halyq alǵysy», Qazaqstan halqy Assambleıasynyń «Birlik» medalderin, QHA tóraǵasynyń Qurmet gramotasy men Alǵys hatyn tabys etti. Sondaı-aq, óńirdegi etnomádenı birlestikterdiń basshylaryna etnosaralyq dostyq qatynastardy nyǵaıtýǵa qosqan eleýli úlesi úshin oblys ákiminiń Alǵys haty tabys etildi. Qaıyrymdylyq baǵyty boıynsha oblys ákiminiń Alǵys haty men nomınatsııalar tabystaldy.