Qyzylordada kisi óltirip, máıitin jasyrmaq bolǵan adam 10 jylǵa sottaldy
QYZYLORDA. QazAqparat - Qyzylorda oblysynda óziniń tanysyn óltirgen azamat 10 jylǵa bas bostandyǵynan aıryldy, dep habarlaıdy QazAqparat tilshisi.
Bul qylmystyq is Qyzylorda oblysynyń qylmystyq ister jónindegi mamandandyrylǵan aýdanaralyq sotynda qaraldy. Atalmysh oqıǵa 2018 jyldyń 31 qańtarynda bolǵan. Sol kúni V. óziniń tanysymen araq ishedi.
«Іshkimdik ishý barysynda ekeýi bir-birimen sózge kelip qalady. Bir-birine qol jumsaıdy. Osy sátte V. tanysynyń betinen qolymen jáne aıaǵymen soqqy beredi. Sonyń saldarynan tanysy oqıǵa ornynda kóz jumady. Óziniń jasaǵan qylmysyn jasyrý maqsatynda ol tereńdigi 50-60 santımetr bolatyn shuńqyr qazyp, jansyz deneni soǵan kómip tastaıdy. Keıinnen bul oıynan bas tartyp, jansyz deneni jasyrýdyń basqa joldaryn qarastyrady. Jansyz deneni qaıta qazyp alyp, ony polıetılen paketpen oraıdy. Sosyn ony óziniń turǵan úıinen 12 shaqyrymdaı qashyqtyqta oryn tepken jerdegi sekseýildiń arasyna aparyp jasyrady», - dep jazylǵan habarlamada.
Sot úkimimen sottalýshy 10 jylǵa bas bostandyǵynan aıyrylyp, jazasyn qylmystyq-atqarý júıesiniń qaýipsizdigi barynsha joǵary mekemesinde óteıdi.
