Qyzylordada kıeli jerlerdi balalarǵa mýltfılm arqyly tanystyrady

QYZYLORDA. QazAqparat. «Qazaqstandaǵy 100 jańa esim» jobasynyń jeńimpazy Symbat Ábdrahmanova Syr óńiriniń tarıhy men kıeli jerlerin, týǵan jerdiń tulǵalary men qasıetin dáripteý maqsatynda «Sıqyrly kilt» atty tanymdyq-fantastıkalyq mýltfılmdi el nazaryna usynýdy josparlap otyr, dep habarlaıdy QazAqparat tilshisi.

S. Ábdrahmanova anımatsııalyq mýltfılm jasap shyǵý úshin 6 aı ýaqyt jumsady. Mýltfılmniń jasalýyna «Bilim Foundation» qoǵamdyq qory demeýshilik jasaǵan.

«Ólkemizdiń keshegi tarıhy men búgingisin baılanystyrǵan týyndyǵa úzdik pedagogtar men tarıhshylardy tarttyq. Sondaı-aq, keıipkerlerdiń únine oblysqa tanymal ártisterdiń daýysy paıdalanyldy. Meniń bul jumysym Syr eliniń týǵan kúnine jasaǵan tartýym bolmaq», - dedi S.Ábdirahmanova.

Aıta ketelik, Syr óńiriniń tarıhynan syr shertetin anımatsııalyq fılm buryn bolmaǵan.

«Bul týyndy bizdiń árbir mektep oqýshysyna Syr óńiriniń tabıǵatyn tanýǵa, tarıhyn bilýge kómegin beredi degen úmittemiz. Ólketaný baǵytyndaǵy árbir sabaqta paıdalanýǵa qolaıly eń tıimdi quralǵa aınalady degen oıymyz da bar», - dedi «Rýhanı jańǵyrý» ortalyǵynyń bólim basshysy Gúlmıra Áshirbekova.

«Sıqyrly kilt» mýltfılminiń tusaýkeseri erteń, 13 maýsymda bolady.