Qyzylordada kenege qarsy kúres bastaldy
QYZYLORDA. 27 naýryz. QazAqparat - Qyzylorda oblystyq medıtsınalyq ortalyǵynda Kongo-Qyrym qandy bezgeginiń tabıǵı oshaqtarynda sanıtarlyq-epıdemııaǵa qarsy sharalar uıymdastyrý máselesine qatysty semınar ótti.
Semınardy memlekettik sanıtarlyq-epıdemıologııalyq baqylaý komıtetiniń oblystyq departamenti uıymdastyrdy. Oǵan Ońtústik Qazaqstan, Jambyl jáne Qyzylorda oblystarynyń epıdemıologtary, zoologtary, bakterıologtary, klınıtsısteri, aýyl sharýashylyǵy basqarmalary men oba aýrýyna qarsy kúres stansylarynyń ókilderi qatysty. Basqosýda respýblıkalyq sanıtarlyq saraptama jáne monıtorıng ǵylymı-tájirıbelik ortalyǵynyń dáriger-epıdemıology Hákimjan Qyraýbaev, Qazaq karantın jáne zoonozdy ınfektsııa ǵylymı ortalyǵynyń qyzmetkeri Talǵat Nurmahanov jáne basqalar bıandama jasady.
Olar ońtústiktegi atalmysh úsh oblystyń aýmaǵynda Kongo-Qyrym qandy bezgegin taratatyn ıksodty kenelerdiń mol shoǵyrlanǵanyn jáne bul óńirlerde atalmysh qaýipti syrqattyń órship ketýine tabıǵı jaǵdaılar qolaıly ekendigin atap ótti. Iksodty kenelerdiń taǵy bir ereksheligi, olar kemirgishterdiń inderin panalap, jabaıy ańdardyń terilerinde tirshilik etedi. Ásirese, úı maldarynyń denelerine jabysqan kezderinde qaýipti bola túsedi. Sondyqtan olarmen kúreste osy haıýanattardy óńdeý jumystaryn tıimdi de sapaly júrgizýdiń mańyzy zor.
Qazirgi tańda respýblıkadaǵy 1009 eldi meken kene qaýpi kóp qolaısyz aýmaqta ornalasqany anyqtalyp otyr. Bulardyń 60-y Qyzylorda oblysynda. Keńes barysynda sońǵy ýaqyttary kene shabýyly kúsheıgen aýmaqtar sany artyp kele jatqany da aıtyldy. Degenmen, ótken jyly elimizde gemorragııalyq bezgektiń 15 deregi ǵana tirkeldi. Bul sonyń aldyndaǵy jylǵa qaraǵanda 4 esege az. Osynyń ózi kenege qarsy kúrestiń tıimdi bola bastaǵanyn kórsetedi. Sonyń ishinde Qyzylorda oblysynda Kongo-Qyrym qandy bezgegine shaldyǵýdyń 4 oqıǵasy tirkeldi.
