Qyzylordada qazaqtyń dástúrli óner akademııasy ashylady
QYZYLORDA. QazAqparat - Qyzylorda oblysynda jyraýlyq ónerdi dáripteıtin qazaqtyń dástúrli óner akademııasy ashylady, dep habarlaıdy QazAqparat tilshisi.
Atalmysh usynys belgili jyraý Almas Almatovtyń usynysy negizinde júzege asyrylyp keledi. Syr boıynda birneshe jyraýlyq óner mektepteri qalyptasqan. Osyǵan oraı jergilikti óner janashyrlary Qyzylordada dástúrli óner akademııasyn ashý týraly usynys jasaǵan edi. Onyń ishinde kolledj, bakalavr, magıstratýra bolýy oılastyrylǵan.
Daıyndyq jumystary oblystyq bıýdjet esebinen atqarylýda. Sondaı-aq QR Úkimeti tarapynan arnaıy qaýly qabyldatý baǵytynda tıisti is-sharalar qolǵa alynǵan.
«Syr boıynyń ózinde de úlken irgeli 3 mektep qalyptasqan. Munda keshegi jyraýlardyń izimen barlyq dástúrler saqtalyp kele jatyr. Ásirese árbir maqamsazǵa degen talǵampazdyq, árbir oryndaýshynyń sheberligin arttyrý, óziniń bolmysyn qalyptastyrý degen sııaqty máseleler basa nazar aýdarylady», - dedi jyraý Serik Jaqsyǵulov.
Akademııanyń materıaldyq-tehnıkalyq bazasy jáne onyń áleýmettik jeńildikteri jergilikti bıýdjetinen sheshiledi dep josparlanyp otyr.
Budan buryn Qyzylorda oblysynda qobyzshylar ansambli qurylatynyn habarlaǵan edik.
