Qyzylordada qazaqtyń atqa miný mádenıetin dáripteıtin kórme ashyldy
Bul shara S.Aıtbaev atyndaǵy kórkemsýret galereıasynda ótkizilip jatyr. Ataýy «Uly dala eliniń tuǵyrly tarıhy»degen taqyrypty qamtıdy. Atalmysh sharaǵa zııaly qaýym ókilderi, joǵary oqý oryndary stýdentteri, oqytýshylary jáne jergilikti qylqalam jáne qolóner sheberleri qatysty.
«Elbasy Nursultan Nazarbaevtyń «Uly dalanyń jeti qyry» atty saraptamalyq baǵdarlamasy ulttyq qundylyqtardy dáripteýge jol ashyp otyr. Sondyqtan búgingi sharanyń urpaqqa ulaǵat syılaıtyn ónegesi az emes. Ádette, qazaq halqy jylqynyń qadiri men qasıetin joǵary baǵalaı bilgen. Er qanaty sanalǵan jylqy maly bizder úshin tek tórt túliktiń biri emes. Tutas bir ulttyń túp-tamyrynan tereń tartatyn baǵaly baılyǵy ekeni belgili. Tildik qorymyzda oǵan qatysty qanshama sóz tirkesteri bar. Qashannan da qazaq halqy attyń ústinen túspegen. Biletinimiz, atbegiler jylqy malynyń 360 gradýstaǵy aýmaqty erkin kóre alatynyn aıtady. Qazirgi tańda medıtsınada ıppoterapııa joǵary baǵalanyp keledi», - dedi Qyzylorda oblysy ákiminiń orynbasary Rýslan Rústemov.
Syr óńirinde bul baǵytta tıisti is-sharalar atqarylyp otyr. Oblys basshylyǵynyń qoldaýymen aımaqta at sportyn damytý maqsatynda arnaıy mektep ashyldy. Oǵan ulttyq at sporty federatsııasy da qoldaý bildirdi.
Atalmysh shara barysynda uzaq jyldan beri atbegilikpen aınalysyp kele jatqan Qojabek Jappasbaı da óz pikirin bildirdi. Ol báıge attaryn baptaýmen birge er-turman ábzelderin jınaýmen aınalysady.
«Men on jasymnan báıgege shaýyp, jylqyǵa degen qyzyǵýshylyǵym oıandy. Qazir er-turman ábzelderin de jınaýmen aınalysamyn. Olardyń arasynda eki ǵasyr buryn jasalǵan dúnıeler de bar. Jalpy, at ábzelderiniń ishinde qamshy joǵary baǵalanady. Oǵan jylqynyń teri men ıisi sińedi. Erte zamanda babalarymyz at ústinde júrgenin bilemiz. Kúndik jol júrgen. Jol-jónekeı myzǵyp alatyn bolǵan. Sondaı sátte qamshyny er-toǵymnyń astyna jastanyp jatady eken. Óziniń aınalasyn attyń shylbyrymen dóńgelektep qorshaǵan kórinedi. Qurt-qumyrsqa, jylan, shaıan sekildi jándikter attyń teri men ıisinen qashyp, ol mańǵa jolamaǵan. Osydan-aq jylqy men qamshynyń qasıetin uǵyna berińiz», - dedi Qojabek Jappasbaı.
Atbeginiń aıtýynsha, jylqy maly óte saq keledi. Bul qasıeti ertede jaýyngerlerge erekshe kómek bolǵan. Ertede keıbir qolbasshylar joryq saparynda aldynan sýat kezdesse, aldymen jylqyny sýarǵan. Osylaısha áskerin kóldeneń keselden saqtandyryp otyrǵan.
Atalmysh kórme tórinen qazaqtyń atqa miný mádenıetinen syr shertetin san alýan jádigerler oryn aldy. Bul jaıynda beınelengen sýretter, at ábzelderi, shabandozdyń kıim úlgisi, etnografııalyq buıymdar men turmystyq zattar kópshilik nazaryna usynyldy. Kórme 15 aqpanǵa deıin sozylady.
Budan buryn Qyzylordada ulttyq dástúrdi dáripteıtin arnaıy joba júzege asatynyn habarlaǵan edik.
