Qyzylordada qazaq ataýyn qaıtarǵan tarıhı nysan kóshirmesi paıdalanýǵa berildi

QYZYLORDA. QazAqparat - Qyzylordanyń 200 jyldyq mereıtoıyna oraı qalanyń jańa aýmaǵy sanalatyn sol jaǵalaýda «Rýhanı jańǵyrý» ortalyǵy men qalalyq murajaı ǵımaratynyń ashylý saltanaty ótti. Bul nysan 1925 jyly Qyzylorda astana mártebesin alǵan tusta ultqa qazaq ataýyn qaıtaryp berý týraly tarıhı sheshim qabyldanǵan Qazaq Ortalyq Atqarý komıteti ǵımaratynyń syzba-nusqasy negizinde salynǵan, dep habarlaıdy QazAqparat tilshisi.

Atalmysh sharaǵa QR Memlekettik hatshysy Gúlshara Ábdihalyqova, oblys ákimi Qyrymbek Kósherbaev jáne birqatar qoǵam qaıratkerleriniń qatysty.

Gúlshara Ábdihalyqova qyzylordalyqtardy qala kúni merekesimen quttyqtap, aımaqtyń áleýmetik-mádenı damýyndaǵy jetistikterin atap ótti.

«Ózderińiz biletindeı, Qazaqstan boıynsha aýqymdy «Rýhanı jańǵyrý» baǵdarlamasy júzege asýda. Sonyń ishinde Qyzylorda oblysynda eskertkishter salynyp, tarıhı jerlerdi qaıta qalpyna keltirý jumystary júrgizilýde. Búgin biz tek arhıtektýralyq eskertkishtiń jaı kóshirmesi ǵana emes, «Rýhanı jańǵyrý» baǵdarlamasy aıasynda sharalar ótkiziletin mańyzdy mádenı nysannyń ashylýyna qatysyp otyrmyz», - dedi Gúlshara Ábdiqalyqova.

Aımaq basshysy Qyrymbek Kósherbaev jınalǵan kópshilikti Qyzylorda qalasynyń mereıtoıy jáne ortalyqtyń ashylý saltanatymen quttyqtady

«Bıyl biz Astana men Qyzylorda qalasynyń mereıtoıyn atap ótýdemiz. 20 jyl buryn Memleket basshysy Nursultan Nazarbaev Táýelsiz Qazaqstannyń elordasyn Astana qalasyna kóshirý týraly strategııalyq sheshim qabyldap, sol arqyly jasampaz memleketimizdiń tutastyǵyn qamtamasyz etti. Qyzylorda Jankent, Shirik-Rabat, Syǵanaq syndy ejelgi astanalardyń jáne Aq Orda men Altyn Orda sııaqty han ordalarynyń aýmaǵy, Keńes odaǵy kezinde Qazaq Respýblıkasynyń astanasy, sondaı-aq, aǵartý, saıası jáne ónerkásiptik damý ortalyǵy boldy. Ultymyzdyń resmı «Qazaq» atalýy týraly sheshim de osy kıeli mekende qabyldandy. Bıyl elordamyz Astananyń 20 jyldyq jáne Qyzylorda qalasynyń 200 jyldyq mereıtoılaryn qatar atap ótýdemiz. Bul Qazaqstannyń alǵashqy jáne qazirgi astanalary arasyndaǵy erekshe rýhanı baılanysty ańǵartady dep oılaımyn. Biz ulttyq qundylyqtarymyzdy saqtap ári jańǵyrtýymyz kerek»,- dedi aımaq basshysy.

Esterińizge sala keteıik, 2017 jyly Syrdarııanyń sol jaǵalaýynda jańa qalanyń qurylysy bastaldy. Qazirgi tańda jeke ınvestıtsııa qarjysy esebinen kópqabatty 18 turǵyn úıdiń, «Bolashaq» ýnıversıteti kampýsynyń jáne memlekettik-jekemenshik áriptestik sheńberinde 320 oryndyq balabaqshanyń, memleket qarjysy esebinen Jastarǵa qyzmet kórsetý ortalyǵy men qajetti ınfraqurylymdardyń qurylysy júrgizilýde. 2019-2020 jyldary sol jaǵalaýda birqatar kópqabatty úıler, mektepter, oblystyq kópsalaly aýrýhana, neke saraıy, balabaqsha, fızıka-matematıkalyq mektep jataqhanasymen birge, saýda-oıyn saýyq keshenin salý josparlanyp otyr.

Qyzylordanyń 200 jyldyǵyna oraı búgin «Qaýyn-Qarbyz», «Qymyz-Shubat» jáne «Baýyrsaq» festıvalderi uıymdastyryldy. Sondaı-aq,  N.Bekejanov atyndaǵy drama teatryndaǵy saltanatty shara ótkizildi. Ortalyq alańda otandyq óner juldyzdarynyń qatysýymen gala-kontsert boldy.