Qyzylordada qaz ben úırekti óndiristik baǵytta ósirý qolǵa alyndy
QYZYLORDA. QazAqparat - Ústimizdegi jyldyń shilde aıynda «Jan-Araı Agro» aýylsharýashylyq óndiristik kooperatıvi qurylyp, oblysta birinshi bolyp qaz ben úırekti óndiristik baǵytta ósirýdi qolǵa alyp otyr.
Oblystyq aýylsharýashylyǵy basqarmasynyń habarlaýynsha, Almaty oblysynan 10 myń dana jumyrtqa ákelinip, búgingi tańda 7 myń bas qaz ben úırektiń balapandary ósirilýde. Osylaısha qala halqyn ekologııalyq taza qus etimen qamtamasyz etýmen qatar, úı jaǵdaıynda qus ósirýge qyzyǵýshylyq tanytqan turǵyndarǵa qaz ben úırek balapandaryn satý kózdelip otyr. Qaz ben úırek ósirý jeke úı jaǵdaıynda óte tıimdi, kóp qarajatty qajet etpeıdi jáne árbir otbasy ózin-ózi sapaly qus etimen tolyq qamtamasyz etýge múmkindik beredi.
«Jan-Araı» ShQ kepil bolyp «Jan-AraıAgro» aýylsharýashylyq óndiristik kooperatıvi qurylyp, oǵan 1 sharýa qojalyǵy jáne 8 jeke kásipker múshe bolyp kirdi.
Sharýa qojalyǵy ınkýbatordan balapan shyǵarý jáne jeke kásipkerlerdi túrli qospalarmen (vıtamındermen) baıytylǵan qunarly jemmen qamtamasyz etedi, al 7 jeke kásipker qus baǵýmen aınalyssa, 1 jeke kásipker qusty soıyp qaptamaǵa (paketke) salyp qala turǵyndaryna qus ónimderin usynady.
Sonymen qatar, qus ósirýge jáne baǵýǵa «Qyzylorda» óńirlik ınvestıtsııalyq ortalyǵy» mıkroqarjy uıymy» JShS-nan «Jan-Araı Agro» aýylsharýashylyq óndiristik kooperatıvi kepil bolyp 90 mln teńge qarjy alýǵa qol jetkizip, ár kooperatıv múshesine 10 mln teńgeden nesıe berildi.
Osy alǵan qarjyǵa kooperatıvke kerekti jabdyqtar alý jáne kooperatıvtiń ǵımaraty salynýda. Qazirgi tańda qustar salmaq qosyp, soıýǵa daıyn ortasha bir qazdyń tirileı salmaǵy 7-8 kg, al úırektiń tiri salmaǵy 4-5 kelige jetken. Aldaǵy qarasha aıynyń ortasynan bastap 3 myń bas qaz ben úırekti etke soıyp, 15 tonna sapaly qus etin qala turǵyndaryna usyný josparlanǵan.
Sonymen qatar, 2017 jyly balapan shyǵaratyn jumyrtqalardy syrttan satyp almaı kooperatıv arqyly daıyndaý maqsatynda qustardyń analyǵyn bólek baǵyp, qysqa daıyndyq jasalýda.
Qazirgi tańda oblys boıynsha 104 aýyl sharýashylyǵy kooperatsııasy qurylǵan. Onyń 94-i Ádilet departamentine tirkelgen bolsa, 10-y qujattaryn ótkizgen. Atalǵan 104 kooperatıvtiń 17-si mal sharýashylyǵy baǵytynda, 31-i eginshilik, 32-si óńdeý salasy boıynsha, bireýi -sý sharýashylyǵy, 13-i kópsalaly kooperatıvter.
