Qyzylordada «Qaısardyń» jańa quramy tanystyryldy: Legıonerlerden kimder bar
QYZYLORDA. QazAqparat - Qyzylordanyń «Qaısar» fýtbol komandasynyń aldyna jańa maýsymda úzdikter qatarynan kórinip, keler jyly Eýropa lıgasynda synǵa túsý maqsaty qoıyldy. Bul mindetti klýbtyń jańa oıynshylaryn tanystyrý sharasynda Qyzylorda oblysynyń ákimi Qyrymbek Kósherbaev júktedi, dep habarlaıdy QazAqparat tilshisi.
«Ústimizdegi jyly «Qaısardyń» qurylǵanyna tup-týra jarty ǵasyr tolady. Mereıli jylda komanda jergilikti jankúıerlerge óz tartýyn jasaýdy josparlap otyr. Sondaı-aq bıyl Qyzylorda qalasynyń da 200 jyldyǵy atap ótiledi. Osyndaı ataýly mereıtoı qarsańynda «Qaısar» jeńisti oıyndarymen jelpinterlik nátıjege qol jetkizýi tıis», - aımaq basshysy.
Atap ótilgendeı, ústimizdegi jyly «qaısarlyqtar» oınaıtyn Ǵ.Muratbaev atyndaǵy ortalyq stadıon kúrdeli jóndeýden ótkizilip, eýropalyq talaptarǵa sáıkestendirilmek. Sporttyq nysannyń jankúıerler otyratyn eki bóliginde shatyr ornatylyp, alańnyń ózi de jańartylady. Osylaısha, stadıon Eýrokýbok oıyndaryn ótkizýge tolyqtaı saı keletin deńgeıge jetedi.
Shara barysynda «Qaısar» komandasynyń bas bapkeri Stoıcho Mladenov kórsetken qamqorlyǵy úshin oblys basshylyǵyna rızashylyǵyn jetkizdi. Búgingi tańda fýtbol klýby - elimizdegi jaǵdaıy jaqsy ujymdardyń biri.
Tanystyrylym barysynda fýtbolshylarǵa kıetin jeıdeleri tabys etildi.
Bıyl «Qaısar» basshylyǵy negizinen byltyr komanda namysyn qorǵaǵan oıynshylarǵa senim artyp otyr. Degenmen, olardyń qataryn kenııalyq shabýylshy Pol Vere, martınıkalyq Ioann Arkın tolyqtyrdy. Sondaı-aq Ashat Taǵybergen men Dáýrenbek Tájimbetov týǵan jerge kóp jylǵy úzilisten keıin oraldy. Komandaǵa basqa da oıynshylar shaqyryldy.
Ádilet QAŃTARBAEV
