Qyzylordada «Qaýipsizdikti qamtamasyz etýdegi servıstik tásil» jobasy júzege asyrylýda
Bul tásildi engizý kezinde krımınogendik, áleýmettik jaǵdaı, ulttyq mádenıet, mentalıtet, zańnama jáne resýrstyq múmkindikter eskerilýi tıis.
«Memleket basshysynyń Qazaqstan halqyna «Jańa jaǵdaıdaǵy Qazaqstan: is-qımyl kezeńde» atty Joldaýynda polıtsııany baǵalaý ólshemin túbegeıli ózgertý, polıtsııa qyzmetin servıstik modelge kóshý, qoǵamdyq qaýipsizdikti qamtamasyz etýdiń tıimdi jaǵdaıyn qurý, basym baǵyttyń biri bolyp belgilengenin aıtty. Polıtsııanyń servıstik modeli - bul halyqtyń bılik organdaryna degen senimdi arttyrý, qaýipsizdikti qamtamasyz etý maqsatynda polıtsııany qoǵammen birlesken qyzmeti bolyp tabylady.
Halyqaralyq tájirıbe negizinde Іshki ister mınıstrligi polıtsııanyń otandyq servıstik modelin alǵash bolyp Qaraǵandy oblysynda júzege asyrdy. 2020 jyldyń 8 qańtarynan bastap Evropadaǵy qaýipsizdik jáne yntymaqtastyq uıymynyń (OBSE) baǵdarlamalar ofısi jáne Qaraǵandy oblysynyń ákimdigi birlese otyryp «Qaýipsizdikti qamtamasyz etýdegi servıstik tásil» pılottyq jobasyn iske qosty. Atalǵan joba Qyzylorda oblysynda ótken jyldyń 15 qarashasynda jumysyn bastady», - dedi Qyzylorda oblysy Polıtsııa departamenti Jergilikti polıtsııa qyzmeti basqarmasynyń bastyǵy polıtsııa polkovnıgi Baýyrjan Ibraev.
Joba sheńberinde oblys ákimdigi janynan Qaýipsizdikti qamtamasyz etý jónindegi vedomstvoaralyq top quryldy. Onyń quramyna ishki ister, prokýratýra, densaýlyq saqtaý, bilim berý, halyqty áleýmettik qorǵaý organdarynyń, jergilikti atqarýshy organnyń (ákimdiktiń), sondaı-aq qoǵamdyq ınstıtýt ókilderi engizildi.
«Vedomstvoaralyq toptyń maqsaty - polıtsııa men qoǵam arasynda seriktestik qarym-qatynas, sondaı-aq naqty aýmaqtaǵy quqyqtyq tártip jaǵdaıyna ortaq jaýapkershilik ornatý. Pılottyq aýmaq retinde Qyzylorda qalasyna qarasty Tasbóget kenti belgilendi. Qazirgi tańda vedomstvoaralyq top múshelerimen taldaý jumystary júrgizilýde. Quqyqbuzýshylyqqa yqpal etetin sebepter men jaǵdaılar anyqtalýda. Nátıjesi boıynsha atalǵan sebepter men jaǵdaılardy joıý jóninde quzyrly organdar men mekemelerge usynymdar ázirlenedi. Bul baǵytta memlekettik organdar men ózge de sala qyzmetterimen quqyq buzýshylyqtyń aldyn alý baǵytynda atqarylatyn sharalar qarastyrylǵan memorandýmdar bekitiledi», - dedi B.Ibraev.
Servıstik polıtsııany damytýda táýlik boıy jumys isteıtin 102 mobıldi qosymshasynyń iske qosyldy. Oǵan qosa modýldik polıtsııa beketteri ashyldy. Qazir oblys ortalyǵynda adamdar kóp shoǵyrlanatyn aımaqtarda 14 modýldik polıtsııa beketi bar.
Ótken jyldyń jeltoqsan aıynda oblystyń shalǵaı aýmaqtarynda qyzmet atqaratyn ýchaskelik polıtsııa ınspektorlaryna 25 dana «JAC» avtokóligi jáne jańa úlgidegi kompterler qoldanysqa berildi. Jol qaýipsizdigin qamtamasyz etý maqsatynda Qyzylorda qalasynyń sol jaǵalaýynda 3 shaqyrymdy quraıtyn avtomobıl joly, 2 shaqyrym jaıaý júrginshi joly men velojolaq salyndy. Sondaı-aq, osy aralyq jaryqtandyryldy. Aldaǵy ýaqytta servıstik polıtsııa modeli negizinde ýchaskelik polıtsııa ınspektorlarynyń halyqpen tıimdi baılanysyn ońtaılandyrý máselesi basym baǵyttardyń biri bolady», - dedi B. Ibraev.
Eske salsaq, Qyzylorda oblysynda shaǵyn jáne orta kásipkerlik nysandarynyń sany artty.
