Qyzylordada qatty turmystyq qaldyqtardy suryptaıtyn keshen salynady
QYZYLORDA. QazAqparat - Qyzylordada qatty turmystyq qaldyqtardy suryptaıtyn keshen salynady, dep habarlaıdy QazAqparat tilshisi oblys ákiminiń baspasóz qyzmetine silteme jasap.
«Jasyl» ekonomıkany damytý tujyrymdamasy aıasynda aımaqta qaldyqtardy jınaý, suryptaý jáne qaıta óńdeý boıynsha keshendi jumystar júrgizilýde. Onyń ishinde qýaty 60 myń bolatyn qatty turmystyq qaldyqtardy suryptaý boıynsha keshen qurylysy josparlanýda.
«Jalpy, qatty turmystyq qaldyqtardy óńdeý jumystary úsh baǵyt boıynsha júrgizilýde: qaldyqtardy jınaý, suryptaý jáne óńdeý. Búgingi kúni oblystyń eldimekenderinde ónerkásiptik jáne turmystyq qaldyqtardy jınaý úshin polıgondar salýǵa 145 jer ýchaskesi bólindi. Qazaly jáne Qarmaqshy aýdandarynda 2013-2015 jyldary polıgondar salyndy. Al Aral jáne Syrdarııa aýdandarynda polıgon qurylysynyń jobalary daıyndaldy. Qazir qalǵan aýdandarda jumystar júrgizilýde», - dedi oblystyq tabıǵı resýrstar jáne tabıǵatty paıdalanýdy retteý basqarmasynyń bólim basshysy Bolat Bısenbaev.
Sondaı-aq, zańǵa sáıkes, 2019 jyldyń 1 qańtarynan bastap órt qaýpi bar qaldyqtardy, plastmassa men polıetılen qaldyqtaryn, quramynda synap bar shamdar men basqa da zattardy, tústi jáne qara metaldardyń áınegi men synyqtary sekildi turmystyq qaldyqtarmen birge kómýge tyıym salynady. Osyǵan baılanysty jyl sońyna deıin qaýipti qaldyqtardy bólek jınaý jáne kádege jaratý úshin suryptaý kesheniniń qurylysy josparlanǵan.
«Qyzylordada qaldyqtardy jınaýǵa arnalǵan qazirgi polıgon 20 jyldan astam ýaqyt boıy paıdalanylyp keledi. Aǵymdaǵy jyly suryptaý kesheniniń qurylysyn bastaý josparlanyp otyr. Keshen qurylysy memlekettik-jekemenshik áriptestik aıasynda josparlanýda. Qazir atalǵan jobany iske asyrýǵa baıqaý jarııalandy. Bizdiń óńirde qaldyqtardy óńdeýmen «Ibraıhan ı K LTD» JShS jáne «Smart Rubber» JShS avtoshınalardy óńdeıtin kásiporyn aınalysatyny belgili», - dedi B.Bısenbaev.
