Qyzylordada kásipkerlikti damytýdyń «Jol kartasy» ázirlendi

Onyń ishinde atalǵan qarajattyń 3 mlrd teńgeden astam bóligi startap jobalarǵa baǵyttalǵan, dep habarlaıdy QazAqparat tilshisi.

Qyzylorda oblysynyń ákimi Qyrymbek Kósherbaev el Táýelsizdigi merekesi qarsańynda jergilikti bıznes-qaýymdastyǵy ókilderimen kezdesti.

Esterińizge sala ketelik, Indýstrııalandyrý kúni aıasynda ótken shara barysynda Qyzylorda oblysy bıznes júrgizýge jaǵdaı jasaǵan úzdik óńir retinde tanyldy.

Memleket basshysy Nursultan Nazarbaev Qyzylorda oblysy ákimi Qyrymbek Kósherbaevqa «Eń úzdik bıznes orta qurǵany úshin» nomınatsııasy boıynsha - «Han Táńiri» marapatyn tabys etken edi.

Kásipkerlermen júzdesý barysynda aımaq basshysy Qyrymbek Kósherbaev kásipkerlerdi Táýelsizdik kúni merekesimen jáne «Eń úzdik bıznes orta qurǵany úshin» nomınatsııasy boıynsha - «Han Táńiri» marapatynyń berilýimen quttyqtady.

Syr óńirinde sońǵy ýaqytta kásipkerlikti damytýǵa basa nazar aýdarylyp keledi. Aldaǵy úsh jyl kóleminde jappaı kásipkerlikti damytýǵa mańyz berilip otyr. Osynyń nátıjesinde salyq bazasynyń ulǵaıýy, jańa jumys oryndarynyń qurylýy jáne qoǵamdyq-saıası ahýaldyń turaqtylyǵynyń jaqsarýy sekildi máseleler oń sheshilip keledi.

«Jyl basynan beri qaıtarymsyz granttar, nesıe alýdyń qadamdyq is-áreketin, tıptik bıznes-josparlardy ázirledik. Al jobalardy súıemeldeý úshin árbir aýyldyq okrýgke oblystyq deńgeıdegi laýazymdy tulǵalar bekitildi. Budan bólek, bekitilgen laýazymdy tulǵalardyń jappaı kásipkerlikti damytý boıynsha esebin aı saıyn tyńdaımyz», - dedi aımaq basshysy.

Kezdesýde «Jan Araı» JShS dırektory Baqdaýlet Maqashov, «Asbol» JShS dırektory Ǵanı Pirimjanov jáne ózge de azamattar oı-pikirlerin bildirdi. Sondaı-aq, óńirdiń birqatar kásipkerleri oblys ákiminiń alǵys hattarymen marapattaldy.