Qyzylordada kásipkerlerdi qoldaý ortalyǵy tıimdiligin kórsetýde
QYZYLORDA. QazAqparat - Qyzylorda oblysynda kásipkerlerdi qoldaý ortalyǵy kásipkerlik salasyn damytýda zor paıdasyn tıgizip keledi, dep habarlaıdy QazAqparat tilshisi.
Elbasy Joldaýynda kásipkerlik salasyn damytý máselesi basty nazarǵa alynǵan. Bul baǵytta tıisti qoldaý kórsetiletini aıtylǵan. Memleket basshysy bıylǵy Joldaýynda «Biz 2010 jyldyń ózinde «Bıznestiń jol kartasy - 2020» baǵdarlamasyn iske qostyq. Óńirlerge jumys saparym barysynda munyń tıimdiligine kóz jetkizdim. Baǵdarlamanyń qoldanylý merzimin 2025 jylǵa deıin uzartý kerek. Osy baǵdarlamany júzege asyrý úshin jyl saıyn qosymsha keminde 30 mıllıard teńge bólýdi qarastyrý qajet. Bul 3 jyl ishinde qosymsha keminde 22 myń jańa jumys ornyn ashýǵa, 224 mıllıard teńge salyq túsirýge jáne 3 trıllıon teńgeniń ónimin óndirýge múmkindik beredi», - dep atap kórsetti.
Syr óńirinde kásipkerlik salasyn óristetýde óreli ister barshylyq. Qazirgi tańda oblysta 42 myńnan astam shaǵyn jáne orta bıznes nysandary belsendi qyzmet kórsetip keledi. Bıylǵy jyldyń alǵashqy alty aıynda 143,3 mlrd teńgeniń ónimi óndirilgen. Jyl basynan beri ekinshi deńgeıli bankter arqyly turaqty bıznestiń 141 jobasyna 9,5 mlrd teńge nesıe berilgen. Olardyń barlyǵyna «Bıznestiń jol kartasy 2020» baǵdarlamasy aıasynda jyldyq paıyz mólsherlemesimen sýbsııadııalaý boıynsha qoldaý kórsetildi.
Sondaı-aq, ishinara kepildendirý boıynsha jalpy quny 1,1 mlrd teńgeni quraıtyn 63 joba kepildendirildi. Bul ótken jylmen salystyrǵanda 1,5 esege artyq. 2017 jyly kepildik quny 650 mln teńgeni quraıtyn 64 jobaǵa qoldaý kórsetilgen.
«Atalmysh oń nátıje baǵdarlama tıimdiligin kórsetedi», - deıdi mamandar.
«Qazirgi tańda oblysta kásipkerlerdi qoldaý ortalyǵy halyqqa qyzmet kórsetip keledi. Ortalyq kásipkerlerge túrli máseleler boıynsha qoldaý jasap otyr. Atap aıtqanda, ınjenerlik jelilerge qosylý boıynsha ortalyq 1300-den astam tehnıkalyq shart usyndy. Kásipkerlik salasyn damytýda jer telimin berý, ınjenerlik tehnıkalyq sharttardy alý, qarjylyq turaqtylyqtyń bolýy mańyzdy máseleler sanalady. Osy oraıda óńirlik kásipkerler palatasy alańynda 50 aýktsıon ótkizildi. Nátıjesinde 593 orta jáne shaǵyn bıznes nysandaryna jer telimderi berilgen», - dedi Qyzylorda oblystyq kásipkerlik jáne týrızm basqarmasy basshysynyń orynbasary Azamat Dosjanov.
Qarjy turaqtylyq qamtamasyz etý maqsatynda Qyzylorda oblysynda 224 kásipkerlik nysanyna 200 mln teńgeni shamalaıtyn qaıtarymsyz grant usynylǵan. Al qala men aýyldyq jerlerde turatyn 1298 kásipkerge 4,2 mlrd teńge kóleminde shaǵyn nesıe usynylǵan. Osyndaı qoldaýdyń nátıjesinde Syr óńiriniń kásipkerlik salasynda 1600-ge jýyq jańa jumys orny ashylǵan.
«Búgingi kúnge deıin júzege asyrylǵan «Bıznestiń jol kartasy 2020» baǵdarlamasy óz tıimdiligin kórsetti. Elbasy Joldaýynda ony 2025 jylǵa deıin uzartý jáne jyl saıyn qosymsha keminde 30 mlrd teńge qarjy bólý máselesi kóterilgen. Osyǵan sáıkes 2019 jyly respýblıkalyq bıýdjetten baǵdarlama aıasynda sýbsıdııalar men kepildikter berý úshn 849,5 mln teńge qarjy qarastyrýǵa ótinimder berilgen», - dedi A.Dosjanov.
Sondaı-aq, 2019 jyly baǵdarlama aıasynda óńirdiń kásipkerlik nysandaryna qoldaý kórsetý úshin 1,6 mlrd teńge qarjy bólý kózdelip otyr. Onyń jartysyna jýyǵy oblystyq, qalǵany respýblıkalyq bıýdjet esebinen qarastyrylady.
Budan buryn Qyzylorda 2019 jyly 1400 beınebaqylaý kamerasy ornatylatynyn jazǵan bolatynbyz.
Sondaı-aq, Qyzylordada IT-park jastardyń startap-jobalaryn ázirleıtinin habarlaǵan edik.
