Qyzylordada kásipkerler qaıtarymsyz granttarǵa ıe bola alady
QYZYLORDA. QazAqparat - Qyzylordada kásipkerler qaıtarymsyz granttarǵa ıe bolý múmkindigi bar. Oǵan beriletin qarjy kólemi 3 mln teńgege jýyqtaıdy, dep habarlaıdy QazAqparat tilshisi.
Tuńǵysh Prezıdent - Elbasy Nursultan Nazarbaevtyń 2018 jylǵy 5 qazandaǵy Qazaqstan halqyna joldaýynda «Bıznestiń jol kartasy» baǵdarlamasy qoldaný merzimin 2025 jylǵa deıin uzartý jóninde atap kórsetken bolatyn.
Aıta keterligi, 2013 jyldan bastap «Bıznestiń jol kartasy 2020» memlekettik baǵdarlamasy aıasynda san alýan jumystar júzege asty. Nátıjesinde jańa bıznes ıdeıalardy jáne bıznes ınkýbatsııalaý sheńberinde ındýstrııalyq-ınnovatsııalyq jobalardy iske asyrý úshin shaǵyn kásipkerlik sýbektilerine 3 mln teńgege deıingi qaıtarymsyz granttar berý konkýrsy júzege asyrylýda. Bıznes ıdeıalardyń jańashyldyǵy múgedekter úshin qoldanylmaıdy, ıaǵnı olarǵa baǵdarlamada basymdyq berilgen.
«Konkýrsqa shaǵyn kásipkerlik sýbektileri, onyń ishinde isin jańa bastaǵan kásipkerler, jas kásipkerler, áıelder, múmkindigi shekteýli jáne 50 jastan asqan azamattar ózderiniń jańa bıznes-jobalaryn usyný arqyly úmitker bola alady. 2019 jyly memlekettik granttar berý konkýrsyna qatysýǵa ótinimder qabyldaý rásimi bıyl 10 maýsymynan bastalyp, 21 maýsymǵa deıin jalǵasady», - dedi oblystyq Kásipkerlik jáne týrızm basqarmasynyń basshysy Ferdoýsı Qojabergenov.
Basqarma basshysynyń aıtýynsha, baǵdarlama talaptaryna sáıkes jobany iske asyrý úshin suratylǵan grant qarajatynyń 10 paıyzy mólsherinde óziniń úlesin qosý qajet. ıAǵnı, kásipker qarjylaı nemese jyljymaıtyn/ jyljymaly múlikpen qatysyp, mindetti túrde jumys ornyn qurýy tıis. Kásipker grant qarajatyn alý úshin mindetti túrde «Bıznestiń jol kartasy 2020» nemese «Eńbek» memlekettik baǵdarlamalary aıasynda kásipkerlik negizderine oqytylýy tıis.
Grant qarajatyn kásipkerge berilýi jóninde arnaıy konkýrstyq komıssııanyń sheshimimen iske asyrylady. Konkýrstyq komıssııasynyń sheshimi oń bolǵan jaǵdaıda oblystyq kásipkerlik jáne týrızm basqarmasy, «Damý» qory jáne kásipker arasynda úshjaqty kelisimshart jasalady.
Memlekettik grant berý konkýrsynyń qaǵıdatyna sáıkes, konkýrs nátıjesi boıynsha oń sheshim berilgen bıznes jobalarǵa grant qarajatyn alǵan kúnnen bastap 1 jyl ishinde shart talaptarynyń oryndalýyna «Damý KDQ» AQ monıtorıng júrgizedi.
Aıta ketetin jáıt, jyl saıyn atalǵan konkýrsqa úmitkerler sanynyń ósýin eskerip, osy jyldyń ekinshi jartyjyldyǵynda qosymsha qarajat tartý maqsatynda oblystyq bıýdjettik komıssııanyń qaraýyna tıisti usynys ázirlený ústinde.
Budan buryn Qyzylordada «jasyl beldeý» jasalatynyn habarlaǵan edik.
