Qyzylordada qashyqtan oqıtyn oqýshylardyń úlesi artty
QYZYLORDA. QazAqparat - Qyzylorda oblysynda epıdemııalogııalyq ahýaldyń kúrdelenýine baılanysty qashyqtan oqıtyn oqýshylardyń úlesi artty, dep habarlaıdy QazAqparat tilshisi.
Oblysta sońǵy kúnderde epıdemııalogııalyq ahýal kúrdelene tústi. Osyǵan baılanysty ata-analardyń ótinishine sáıkes qashyqtan oqıtyn oqýshylar kóbeıdi. Búgingi kúni oqýshylardyń 70 paıyzy dástúrli, 30 paıyzy qashyqtan oqıdy. Tórtinshi oqý toqsanyn oblystaǵy 169 883 oqýshynyń 167 571-i dástúrli, 2 312-si qashyqtan bilim alýdy bastaǵan.
«Búginde keıbir ata-analardyń ótinishi boıynsha, oqýshylar onlaın rejımge kóshirilýde. Ol úshin ata-anasynyń ótinishi bolsa jetkilikti. Ótken aptamen salystyrǵanda qashyqtan oqıtyndardyń sany 14535-ke jetti. Al qalǵan oqýshylar dástúrli formatta oqýyn jalǵastyrýda. Jalpy, oqýshylar men pedagogtar arasynan qaterli vrýs tirkelgen jaǵdaıda tıisti synyptar qashyqtan oqytýǵa kóshirilip, birden karantınge jiberiledi. Qazir mektepterde dezınfektsııalyq tazalaý quraldary men qoldy óńdeýge arnalǵan antıseptıkterdiń qorlary jetkilikti», - dedi oblystyq bilim basqarmasynyń basshysy Aqzıra Qasymova.
Sondaı-aq, qazir mektepterdegi sanıtarlyq talaptardyń oryndalýyn baqylaý úshin bilim basqarmasy men bilim bólimderi janynan monıtorıngtik toptar qurylǵan. Atap aıtqanda, 5-10 sáýir aralyǵynda atalǵan top ókilderi Qyzylorda qalasyndaǵy 21 mektepke baqylaý sharalaryn júrgizdi. Budan bólek, bilim uıymdarynda koronovırýs ınfektsııasynyń aldyn alý maqsatynda oqýshylarǵa aýrýdyń belgileri, onyń qalaı juqatyny jáne qorǵaný sharalary týraly áleýmettik beınerolıkter kórsetildi.
Aıta keteıik, Qyzylordada 10659 adam koronavırýs ınfektsııasyna qarsy vaktsına saldyrdy.
