Qyzylordada karantın sharalary kúsheıtildi
Qyzylordada epıdemıologııalyq jaǵdaı tolyq turaqtanǵanǵa deıin jańa shekteýler engizildi. «Qambash» demalys ornynyń jumysy toqtatyldy. Balalar saýyqtyrý lagerlerin iske qosý merzimi keıinge shegerildi.
«Sondaı-aq, ujymdyq, otbasylyq týǵan kún, dástúrli, ádet-ǵuryp sharalary sekildi jıyndarǵa, olardy meıramhanada ótkizýge tyıym salý jalǵasady. Kompıýterlik klýbtar, moto jáne loto keńseler, bılıard klýbtary, táýliktik páterler men úılerdi jalǵa alý qyzmeti, balalar oıyn alańdarynyń qyzmetine shekteý jalǵasýda. Sanıtarlyq talaptardyń saqtalýy mobıldik toptardyń reıdteri men polıtsııa qyzmetiniń áskerı bólimderdiń sarbazdaryn tarta otyryp patrýldeý arqyly kúsheıtilip otyr», - dep málim etti Qyzylorda oblysynyń taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary, oblystyń bas memlekettik sanıtar dárigeri Álııa Ábdiqaıymova.
Vedomstvonyń málimetinshe, búgingi kúni oblysta sanıtarlyq normalardy buzǵany úshin 2 kásipkerlik nysanyna ákimshilik hattama toltyrylyp, materıaldar sotqa joldanýda. Budan bólek, emdeý mekemeleri boıynsha aýrýdyń kúrt ósýine soqtyrǵan nysandar boıynsha 13 medıtsına qyzmetkerine aıyppul salynyp, bir materıal ekonomıkalyq sotqa joldandy.
Budan buryn Araldaǵy tosqaýyl beketteri ázirge jumysyn jalǵastyratyny habarlanǵan edi.
Qazir Qyzylorda oblysynda koronavırýs ınfektsııasyn juqtyrǵan 465 adam bar. Onyń ishinde 291 adam syrqatynan jazylyp shyqty.