Qyzylordada qaraquıryq atqandar 12 mln teńge tóleıtin boldy
QYZYLORDA. QazAqparat - Qyzylorda oblysynda polıtsııa qyzmetkerleri ań aýlaý barysynda Qyzyl kitapqa engen 2 qaraquıryq jáne 33 qoıan atyp alǵan jergilikti turǵyndarǵa qatysty sot úkimi shyqty, dep habarlaıdy QazAqparat tilshisi.
Bul oqıǵa Qyzylorda oblysy Jalaǵash aýdanyna qarasty Jańadarııa aýyly aýmaǵynda bolǵan. Qyzylorda oblysy Polıtsııa departamentiniń Jergilikti polıtsııa qyzmeti basqarmasynyń tabıǵatty qorǵaý polıtsııa bóliminiń qyzmetkerlerimen júrgizilgen reıdtik is-sharalar barysynda tabıǵatqa eleýli zalal keltirgen turǵyndar qolǵa tústi. Olar mingen «Toýota Land Cruiser» markaly avtokóligin tekserý barysynda 2 qaraquıryq, 33 qum qoıany, eki dana 12 kalıbrli 1 uńǵyly myltyqtary zattaı dálel esebinde alyndy.
«Osyǵan baılanysty kúdikti 32-33 jastaǵy eki azamatqa qatysty QR Qylmystyq kodeksiniń 337-babynyń 4-bóligimen sotqa deıingi tergep-tekserý júrgizildi. Jınaqtalǵan materıal Jalaǵash aýdandyq sotyna joldanǵan. Jalaǵash aýdandyq sotynyń úkimimen N.J. men E.H. azamattarǵa 2 jyl 6 aı merzimge bas bostandyǵynan shekteý jazasy taǵaıyndaldy. Osy merzimde olar probatsııalyq baqylaýǵa alynǵan. Sondaı-aq, sottalýshylardan memleket paıdasyna 8 mln. 729 myń 978 teńge jáne keltirilgen zalal úshin 3 mln. 284 myń 378 teńge óndirýge úkim shyǵarylǵan. Soǵan oraı «Toýota Land Cruiser» markaly avtokóligi, eki dana 12 kalıbrli 1 uńǵyly myltyqtary memleket paıdasyna tárkilendi», - dep habarlaıdy Qyzylorda oblysy Polıtsııa departamentiniń Baspasóz qyzmeti.
Aıta keteıik, Qazaqstan Respýblıkasy Úkimetiniń 2006 jylǵy 31 qazandaǵy №1034 qaýlysyna sáıkes qaraquıryq ańy - janýarlardyń sırek kezdesetin jáne quryp ketý qaýpi tóngen túrleriniń tizbesinde bar. Oǵan qosa Qazaqstan Respýblıkasynyń Qyzyl kitabyna engizilgen.
