Qyzylordada qaraqshylyq shabýyl úshin izdeýde júrgen kúdikti ustaldy
Ony Qyzylorda oblysy polıtsııa departamentiniń krımınaldyq polıtsııa basqarmasynyń qyzmetkerleri ustady. Ol qylmystyq top quramynda bolyp, 2019 jyldyń tamyz aıynyń sońynda kásipkerdiń úıine qaraqshylyq shabýyl jasaǵan bolatyn.
«Qylmys barysynda zergerlik buıymdar men 300 mln teńgege jýyq aqshany jymqyrǵan. Al úı ıesi aýyr dene jaraqatyn alyp, aýrýhanada kóz jumdy. Qazirgi tańda kúdikti qamaýǵa alynǵan. Oǵan qatysty QR Qylmystyq kodeksiniń 192-baby 4-bóligimen jáne 99-baby 2-bóligimen qylmystyq is tergelýde», - dep málim etti Qyzylorda oblystyq polıtsııa departamentiniń baspasóz qyzmeti.
Eske sala keteıik, ótken jyly tamyz aıynda kásipkerge shabýyl jasalǵan edi. Kóp uzamaı qaraqshylyq qylmys jasaǵan 5 adam ustaldy. Olarǵa qatysty qylmystyq is sotta qaralýda.