Qyzylordada qant pen tuz tıelgen júk kóligi janyp ketti

QYZYLORDA. QazAqparat - Qyzylordada qant pen tuz tıelgen júk kóligi janyp ketti, dep habarlaıdy QazAqparat tilshisi.

Oqıǵa búgin, 5 qarashada saǵat 11.25 shamasynda «Batys Qytaı - Batys Eýropa» tas jolynyń Qyzylorda qalasy tusyndaǵy aınalmaly kópir mańynda boldy. Jergilikti seriktestik menshigindegi «GAZ-3307» júk kóliginde árqaısysy 50 kelilik 60 qap qant, 20 qap tuz jáne 100 blok sýsyn ónimderi tıelgen.

«Oqıǵa ornyna Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń №6 órt sóndirý bóliminen 1 tehnıka men 6 qyzmetker bardy. Órttiń shyǵý sebebi ázirge belgisiz. Kelgen shyǵyn mólsheri anyqtalýda», - dep málim etti Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.

Esterińizge sala ketelik, budan buryn Qyzylorda oblysynda avtokólik tolyǵymen janyp ketken bolatyn.