Qyzylordada qant dıabetine shaldyqqan balalar kóbeıgen
QYZYLORDA. QazAqparat - Qyzylorda oblysynda balalar arasynda qant dıabetine shaldyqqandardyń qatary kóbeıip barady, dep habarlaıdy QazAqparat tilshisi.
Sońǵy úsh jylda Syr óńirinde 165 bala qant dıabetine baılanysty dıspanserlik esepke alynǵan. Bul rette, óńirde pompolog-mamandardyń joqtyǵy atap ótilýde. Sondaı-aq ata-analar men balalar ınsýlındik qurylǵyny qoldanýdy bile bermeıdi. Aldaǵy ýaqytta oblysta endokrınologııalyq qyzmetti damytý, syrqattaný deńgeıin tómendetý baǵyttaryna nazar aýdarylmaq. Osy maqsatta «Jol kartasy» júzege asyrylatyn bolady.
Qant dıabetine shaldyqqan balalar arasynda eń kishisiniń jasy áli birge tola qoımaǵan. Dıabet vırýsty ınfektsııalardan keıin bastalýy múmkin. Syrqattanǵan balalar arnaıy qurylǵyǵa táýeldi bolady. Atalmysh apparat aǵzaǵa mıkromólsherli ınsýlın bólip otyrady. Qazir mundaı qurylǵy 94 balada bar. Desek te, ony durys qoldana bermeıtin ata-analar da kezdesedi.
«Osy baǵytta oblystyq balalar aýrýhanasyndaǵy dıabet mektebinde tıisti sharalar qolǵa alynady. Ol jumystardy 2019 jylǵa josparlap otyrmyz. Arnaıy qurylǵylarǵa qajetti bólshekter men dárilik suıyqtyqtarǵa da qarjy qajet etiledi. Bul baǵytta memlekettik-jekeshelik áriptestik jobalary aıasynda jumystar júzege asady dep kútilýde», - dedi Qyzylorda oblystyq Densaýlyq saqtaý basqarmasynyń bólim basshysy Bıbizada Dúısenbaeva.
