Qyzylordada kanalǵa batyp ketken jergilikti 2 azamattyń deneleri áli tabylmaı jatyr
QYZYLORDA. QazAqparat - Qyzylorda oblysy Syrdarııa aýdanynda mal izdeýge shyǵyp, Qaraózek arnasyna «ÝAZ Fermer» avtokóligimen batyp ketken eki azamattyń deneleri bir aıǵa jýyq ýaqyttan beri tabylmaı jatyr, dep habarlaıdy QazAqparat tilshisi.
Ońtústik óńirlik aeroutqyr jedel qutqarý jasaǵy memlekettik mekemesiniń basshysy Baqyt Embergenov atalmysh oqıǵa jaıynda baıandap berdi. Oqıǵa byltyrǵy 17 jeltoqsanda bolǵan. Ol jaıynda budan buryn habarlaǵan edik.
Sol kúni 45 jáne 54 jastaǵy eki azamat avtokólikpen mal izdeýge shyqqan. Olar avtokólikterimen Qaraózek arnasyna túsip ketken.
«2018 jylǵy 18 jeltoqsan kúni tańǵy saǵat 6.15-te jasaqtan 4 qutqarýshy 1 birlik tehnıka jáne 1 úrlemeli motorly qaıyqpen jáne súńgýirlik qural-jabdyqtarymen oqıǵa ornyna jetti. Onda týystarynan 20 adamnyń qatysýymen qutqarýshylar Qaraózek arnasynda sýasty jáne sý betinde izdestirý jumystaryn júrgizdi. Іzdestirý jumystary barysynda saǵat 10.30-da qutqarýshylar sý astynda jatqan «ÝAZ Fermer» avtokóligin tapty. Biraq, onda adamdar bolmaı shyqty. Saǵat 18.10-da avtokran kómegimen sý astyndaǵy avtokólik jaǵaǵa shyǵaryldy.
Joǵalǵan adamdar sý astynan súńgýirlik, sý betinde arnanyń tabanyn tyrmalap súzý ádisimen qaıyqpen izdestirildi. Sondaı-aq jasaqtyń kınologtary ıisshil ıtterdi de paıdalandy. Qaraózek arnasynda seń júrýine baılanysty 20-21 jeltoqsan kúnderi sýasty izdestirý jumystary toqtatyldy. Ol jumys 23 jeltoqsannan bastap qaıtadan jalǵasty», -dedi B.Embergenov.
Byltyrǵy 18-31 jeltoqsan kúnderi qutqarýshylar sý astyna 13 ret tústi. Súńgýirler sý astynda 8 saǵat boıy jumys jasaǵan. Qazirgi tańda izdestirý jumystaryna muz astynda sý aǵysynyń kúsheıýi, súńgýirshilerdiń demalý avtomattarynyń qatyp qalýy qıyndyq týǵyzýda.
