Qyzylordada kanaldaǵy sýǵa batyp ketken balanyń denesi eki kúnnen beri izdestirilýde
QYZYLORDA. QazAqparat - Qyzylorda qalasynda kanalǵa, sýǵa batyp ketken segiz jastaǵy ul balanyń denesi eki kúnnen beri tabylmaı jatyr, dep habarlaıdy QazAqparat tilshisi.
Oqıǵa oblys ortalyǵyna qarasty Qaraýyltóbe aýyldyq okrýginde 25 mamyrda keshki saǵat 20.30 shamasynda bolǵan. Sol ýaqytta týysymen egistikti sýarý kanaly ústindegi júrginshiler ótkelinen ótip bara jatqan ol abaısyzda qulap, kanalǵa sýǵa batyp ketken.
«Onyń denesin izdeý jumystary 25 mamyrda saǵat 21.25-ten bastaldy. Oqıǵa ornyna oblystyq tótenshe jaǵdaılar departamenti órt sóndirý jáne avarııalyq qutqarý jumystary qyzmetiniń mamandary kelip jetti. Súńgýirler sý astynan izdeý sharalaryn júrgizdi. Al motorly qaıyqtyń kómegimen qutqarýshylar sý betin tekserdi. Osyndaı izdeý sharalary 26 mamyrda jalǵasty. Degenmen óz nátıjesin bergen joq. Atalǵan sharalar búgin, 27 mamyrda jalǵasýda. Oqıǵa ornynda barlyǵy 168 adam izdeýge atsalysýda. Olardyń arasynda balanyń týystary, tıisti sala mamandary, eriktiler bar», - dedi oblystyq tótenshe jaǵdaılar departamenti órt sóndirý jáne avarııalyq qutqarý jumystary qyzmetinen.
Eske salsaq, budan buryn Qyzylordada on jastaǵy er bala sýǵa batyp ketti.
