Qyzylordada qamaýda otyrǵan aǵasyna qaryndasy baýyrsaqqa jasyryp, telefon ótkizbek boldy

QYZYLORDA. QazAqparat - Qyzylordada tergeý ızolıatorynda qamaýda otyrǵan aǵasyna baýyrsaqqa jasyryp telefon ótkizýge áreket etken qaryndasy ustaldy, dep habarlaıdy QazAqparat tilshisi.

Atalǵan sálemdemeni teksergen mekeme qyzmetkerleri baýyrsaqqa jasyrylǵan tyıym salynǵan zatty tárkiledi. Qaryndasy aǵasyna «Nokia» markaly telefony men qýattaǵysh qurylǵysyn folga kaǵazyna orap, baýyrsaq ishine jasyryp ótkizbek bolǵan.

«Qamaýdaǵy aǵasy QR Qylmystyq kodeksiniń 106-baby boıynsha 8 jylǵa bas bostandyǵynan aıyrylǵan. Qazirgi tańda atalǵan derek boıynsha QR Ákimshilik quqyq buzýshylyq týraly kodeksiniń 481 babyna sáıkes is qozǵaldy. Qujattar protsessýaldyq sheshim qabyldaý úshin Qyzylorda qalalyq ákimshilik sotyna joldandy», - dep málim etti Qyzylorda oblystyq qylmystyq atqarý júıesi departamentiniń baspasóz mamany .

Budan buryn da Qyzylordada tergeý ızolıatorynda sálemdemeden telefon tabyldy.